Бухоро вилоятининг Когон туманида метеорологик радиолокатор (МРЛ) ускунаси ўрнатилиб, фойдаланишга топширилди. Бу ҳақда «Дарё» мухбири хабар бермоқда.
Таъкидланишича, Финландиянинг «ВАИСАЛА ОйЖ» компанияси билан ушбу метеорологик радиолокатор ускунасини етказиб бериш, ўрнатиш ва ишга тушириш бўйича келишув расмийлаштирилган, салкам икки йил давомида амалга оширилган.
«Ўзгидромет» маркази етакчи мутахассиси Эркин Абдуаҳатовнинг айтишича, мазкур радиолокатор бир миллион долларга харид қилинган.
«Метеорологик радиолокатор 200 километр радиусда мавжуд ва кутилаётган об-ҳаво ҳодисалари тўғрисида, хусусан, ёғинлар миқдори ва тури (ёмғир, дўл, қор) ҳамда унинг давомийлиги, шамол тезлиги ва йўналиши, чақмоқ ва момақалдироқ хусусиятлари, булутлар оқими ва турини реал вақт кўринишида олиш имкониятини беради.
Мазкур локатор Қашқадарё, Навоий, Самарқанд, Туркманистон ва Бухоронинг барча ҳудудларидаги об-ҳаво ҳодисаларини осмонда кузатиб, метеорологик карталарга туширади ва олдиндан хабардор қилади. Мисол учун, Туркманистондан кучли шамол кириб келаётган бўлса, биз шамол хавфини икки соат олдин кўра олишимиз мумкин.
Маълумотлар ҳар 10 дақиқада янгиланади ва мунтазам равишда Ўзгидрометнинг метеорологик локаторлар географик ахборот-таҳлилий геопорталига узатиб борилади», — дейди Эркин Абдуахатов.
Қайд этилишича, ушбу метеорологик радиолокаторнинг Когон туманига ўрнатилиши тизимда замонавий ахборот технологияларини қўллаш, шу орқали об-ҳаво прогнозлари сифатини кескин оширишга ҳамда метеорологик кузатувларда микро моделлардан фойдаланган ҳолда, ҳудудлар кесимида қисқа муддатли прогнозлаш имконини яратади.
Изоҳ (0)