Бухородан Навоий вилоятига олиб ўтилаётган истеъмолга яроқсиз, антисанитар аҳволдаги 500 килограмм гўшт йўқ қилинди. Бу ҳақда «Дарё»га Навоий вилоят ИИБ ахборот хизмати раҳбари Ўктам Усмонов хабар берди.
Навоий вилоятининг Кармана туманида жойлашган «Самарқанд» мунтазам йўл-патруль хизмати масканида 2022 йилнинг 30 март куни тунги соат 23:45 да тўхтатилган Nexia Бухородан 500 килограмм истеъмолга яроқсиз гўшт олиб келаётгани маълум бўлган.
ЙПХ ходимлари ҳайдовчи ҳужжатларини кўздан кечириб, машина салонидаги гўштнинг санитария-гигиена қоидаларига зид равишда олиб кетилиши сабаби ҳақида сўраб, гўштнинг сифатини кафолатловчи ҳужжати борлиги билан қизиққан.
«Nexia’нинг орқа ўриндиғида ҳам яроқсиз гўштлар жойлаштирилгани ва унинг усти ифлос аҳволдаги автомашина баллонлари билан беркитиб қўйилгани маълум бўлган. Шунингдек, маҳсулотдан бадбўй ҳид чиқаётган бўлган. Шундан сўнг ушбу гўшт маҳсулотлари карантин тадбирларини таъминлаш гуруҳи ходимлари назоратида лабораторияга келтирилган. Экспертиза хулосаси учун текширувдан ўтказилган», — дейди Ўктам Усмонов.
Экспертиза хулосасига кўра Навоийга пуллаш мақсадида олиб кирилаётган 500 килограмм гўшт истеъмолга яроқсиз бўлиб чиққан.
«Истеъмолга яроқсиз гўшт холислар иштирокида махсус печда ёқиб юборилди», — дейди вилоят ИИБ вакили.
Ҳолат юзасидан текширувлар давом этмоқда.
Изоҳ (0)