Миср футбол ассоциацияси ЖЧ—2022 саралаши доирасида Сенегалга қарши кечган ўйиндаги ҳолатлар бўйича ФИФАга шикоят аризасини ёзди.
«Миср футбол федерацияси Сенегалга қарши ўйин олдидан учрашув инспектори, хавфсизлик ходими, Африка футбол конфедерацияси ва ФИФАга расмий шикоят билан мурожаат қилди.
Миср терма жамоаси майдонга чиқиб келаётган вақтда ирқчилик кайфиятидаги ҳақоратларга учраган. Қолаверса, трибуналарда футболчиларга, айниқса, Муҳаммад Салоҳга қарши ҳақоратли баннерлар ўрнатилган.
Сенегал терма жамоаси мухлислари машғулотлар вақтида мисрлик футболчиларга қарата шиша ва тош улоқтирган. Ундан ташқари мухлислар Миср терма жамоаси автобусига ҳам ҳужум уюштирган ва бунинг натижасида ойна синган, бир неча киши жароҳатланган. Буларнинг барчаси фото ва видеоларга муҳрланган ва шикоятга илова қилинган», — дейилади баёнотда.
Сенегал терма жамоаси мухлислари ўйин давомида мисрлик футболчиларнинг кўзига лазер тутди. Пенальтилар серияси вақтида эса бу яққол кўринди. Жамоа сардори Муҳаммад Салоҳ пенальтидан гол ура олмади. Бундан ташқари, дарвозабон ва бошқа ўйинчиларга ҳам халақит беришга ҳаракат қилинди.
Миср ЖЧ—2022 саралаш босқичида Сенегалга имкониятни берди ва мундиал йўлланмасини қўлдан чиқарди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)