Ўзбекистон мусулмонлари идорасида Рамазон ойини муносиб кутиб олиш ва ислом дини тартиб-қоидалари асосида ойни кузатиш бўйича ишчи гуруҳ тузилди. Бу ҳақда идора матбуот хизмати хабар берди.
Маълум қилинишича, таниқли уламолар ва малакали мутахассислардан иборат ишчи гуруҳ Рамазон ойи киришини астрономик таҳлиллар асосида кузатиб боради ва унинг натижаларини Ўзбекистон мусулмонлари идораси Уламолар кенгашига киритади. Рамазон ойи бошланиши ҳақидаги хабар Уламолар кенгаши томонидан кўриб чиқилади.
25 март куни Нур-Султон шаҳрида мамлакат бош муфтийси Наврўзбай Тағанули раислигида Қозоғистон мусулмонлари идораси президиум йиғилиши ўтказилганди. Йиғилишда Қозоғистонда 2022 йилдаги Рамазон ойи 2 апрелдан бошланиб, 2 майга қадар давом этиши эълон қилинган. Таъкидланишича, Рамазон ойининг бошланишига доир қарор Ўзбекистон ва Қирғизистон муфтиятлари билан келишув асосида қабул қилинган.
Эслатиб ўтамиз, 2021 йилда Ўзбекистонда Рамазон ойи 13 апрелдан бошланган, мамлакатдаги 1400 га яқин масжидда Қуръони карим хатм қилинган эди.
Мавзуга доир: «Рамазон ойида Умра нархи ошади» — Мусулмонлар идораси
Изоҳ (0)