Amazon компанияси максимал базавий иш ҳақи миқдорини қарийб икки бараварга – 160 000 доллардан 350 000 долларга оширди. Бу ҳақда Bloomberg хабар берди.
Ўтган йилда меҳнат бозори сезиларли даражада қизғин бўлди, биз бир неча йўналишлар бўйича чуқур таҳлил олиб бориб, бизнесимиз иқтисодиёти имкониятларини чамаладик ва охир-оқибат тажрибали ходимларни жалб қилиш ҳамда уларни сақлаб қолиш мақсадида базавий иш ҳақи даражасини олдинги йиллардан кўра кўпроқ оширишга қарор қилдик, – дейилади компаниянинг ўз ходимларига йўллаган хабарномасида.
Amazon дунё бўйича кўплаб ходимларга тўланадиган иш ҳақи даражаларини ошираётгани ва акциялар орқали мукофотлашни реклама акцияларига мувофиқ ўзгартираётганини билдирди. Йирик компаниялар сингари Amazon ҳам ходимларни жалб қилиш ва сақлаб қолиш билан боғлиқ масалаларга дуч келган.
Базавий иш ҳақи даражалари паст бўлишига қарамай, компания ходимларни акциялар билан рағбатлантириш уларни ўзига жалб қилишини эътиборга олган ҳолда ушбу кўринишдаги мукофот усулидан кўпдан буён фойдаланиб келади.
Бироқ 2021 йилда S&P 500 кўрсаткичи 27 фоизга кўтарилган бир пайтда акциялар бор-йўғи 2,4 фоизга етди, бунинг оқибатида стратегия ўз жозибадорлигини йўқотди. Оммавий ахборот воситаларида ёзишларича, Amazon’даги ходимлар қўнимсизлиги инқироз даражасига етиб, 50 нафар вице-президент ишдан кетган.
Онлайн савдо гиганти бутун дунё бўйлаб, соатбай ҳақ тўланадиган омбор ишчисидан бошлаб йиллик даромад олувчи офис ходимигача бўлган 1,6 млн нафар ишчини ишга олди. Компания душанба куни эълон қилинган иш ҳақи миқдорини қанча ходим олишини айтишдан бош тортди.
Amazon омбор ишчиларига соатига камида 15 доллар ҳақ тўлаб келган бўлса, ўтган йилнинг сентябрь ойида уларнинг ўртача иш ҳақини соатига 18 долларга оширишини айтган. Пандемия даврида компания томонидан логистик операцияларга кўп маблағ сарфланди, минглаб ишчилар ёлланди ва янги ходимларга бонуслар тақдим этилди.
Сармоядорлар Amazon’нинг ортиб бораётган сарф-харажатларини хавотир билан кузатиб боришаётган эди, бироқ ўтган ҳафта тўртинчи чоракда компания томондан эришилган йирик натижа ва йиллик Prime обунанинг 20 доллардан 139 долларга етгани уларга енгиллик ҳиссини бергани сир эмас.
Изоҳ (0)