24 январь куни Халқ депутатлари Фарғона шаҳар кенгашининг навбатдан ташқари сессияси бўлиб ўтди, деб хабар беради «Дарё» мухбири.
Маълум қилинишича, сессия ишида вилоят ҳокими Хайрулло Бозоров, шаҳар кенгаши депутатлари, вилоят ва шаҳар ҳокимларининг ўринбосарлари, секторлар, бошқарма ва ташкилотлар раҳбарлари, маҳаллалар раислари, жамоатчилик фаоллари, ОАВ вакиллари иштирок этган.
Сессияда сўз олган Хайрулло Бозоров шаҳар ҳокими вазифасида ишлаб келган Мирзоҳид Убайдуллаев Иқтисодий тараққиёт ва камбағалликни қисқартириш вазирининг ўринбосари – Маҳаллабай ишлаш ва тадбиркорликни ривожлантириш агентлиги директори лавозимига тайинлангани, собиқ шаҳар ҳокими фаолияти самарали бўлгани, унга катта ишонч билдирилганини айтиб ўтган.
Вилоят раҳбари, шунингдек, Фарғона шаҳридаги ўзгаришлар, имкониятлар, қилинган ишлар ва олдинда турган вазифалар ҳақида ҳам тўхталиб ўтган. Сессияда Хайрулло Бозоров Восилжон Назаров номзодини Фарғона шаҳар ҳокими лавозимига тавсия қилган.
«Ташаббускор, изланувчан раҳбар, бефарқ эмас, ҳаракатчан, фидойи, ёш кадрлардан бири», — дейди вилоят ҳокими.
Маълумот учун, Восилжон Назаров 1984 йил Бувайда туманида туғилган. Тошкент давлат иқтисодиёт университетини тамомлаган. 2006 йилдан молия тизимида меҳнат қилиб келган, 2019—2021 йилларда вилоят молия бош бошқармаси бошлиғи, 2021 йилдан Бағдод тумани ҳокими лавозимида фаолият юритиб келаётганди.
Аввалроқ Халқ депутатлари Бағдод тумани кенгашининг 24 январь куни бўлиб ўтган навбатдан ташқари сессиясида Юсуфжон Хусаинов Бағдод тумани ҳокими этиб тайинлангани тўғрисида хабар берилганди.
Мавзуга доир: Юнусобод туманига янги ҳоким тайинланди
Изоҳ (0)