Ўзбекистон тиббий-илмий фаолият билан шуғулланувчилар Табобат академияси аъзолари Туркияда малака оширади. Бу ҳақда Ўзбекистон тиббий-илмий фаолият билан шуғулланувчилар Табобат академияси раиси, кимё фанлари доктори, профессор Иброҳимжон Асқаров «Дарё»га маълум қилди.
Профессор Иброҳимжон Асқаровнинг таъкидлашича, академия аъзоларини малакасини ошириш, ўзаро тажрибаларни алмашиш мақсадида Туркиянинг Истанбул шаҳрида замонавий тиббиёт ҳамда анъанавий табобат соҳаси вакиллари билан музокаралар олиб борилган.
«Туркия Соғлиқни сақлаш вазирлиги таклифига кўра, Европа стандартлари асосида ишловчи шифохоналарда ўзбекистонлик тиббиёт ходимлари ва табиблар малакасини оширишга келишиб олдик. Табобат академиясига аъзо бўлган шифокорлар ва табиблар у ерда тиббиётнинг барча йўналишлари, шунингдек, табобат соҳасида ўқув курсларида қатнашади», — деди академия раҳбари.
Профессорнинг қўшимча қилишича, шифокорлар ва табибларни ўқиши ва яшаш харажатлари академия маблағлари ҳисобидан қоплаб берилади.
«Туркияда малака ошириш истагида бўлганлар академия аъзолари орасидан танлов йўли билан саралаб олинади. Ўқиш курслари келишувга кўра, босқичма-босқич давомий равишда йўлга қўйилади», — деди Иброҳимжон Асқаров.
Маълумот учун, Ўзбекистон тиббий-илмий фаолият билан шуғулланувчилар Табобат академияси ҳозирда Япония ва Малайзиядаги тиббиёт муассасалари билан ҳамкорлик қилиб келмоқда. Келгусида Финляндия билан ҳамкорлик қилиш ва тиббиёт ютуқларини Ўзбекистонда ҳам жорий этиш режалаштирилган.
Мавзуга доир:
- ССВ вакили: Қисқа вақт ичида табибларга лицензия бериш йўлга қўйилади
- Япония медицина ассоциацияси раиси: Табобат билан шуғулланувчиларга янада кўпроқ эркинлик бериш керак
- Табобат академияси калтакланаётган шифокорларни ҳимоя қилишда давлат органларига кўмаклашмоқчи
- Табобат академияси раиси: Табиб шифокорни, шифокор эса табибни тан олиши керак
Изоҳ (0)