«Компроматузб» Telegram каналида «Ҳокимга сабр тилаймиз. 200 минг доллар топиш осонмас!» сарлавҳаси остидаги хабар турли талқиндаги муносабатларга сабаб бўлди. «Дарё» мухбири ушбу ҳолат юзасидан тезкор суриштирув ўтказди.
«Дарё» мухбири билан телефон орқали боғланган Бухоро шаҳар ҳокими ҳолатга ўз муносабатини билдирди.
«Яқиндагина даволанишдан чиқдим. Лекин бу хабар асоссиз ва ҳеч қандай мантиққа тўғри келмайди. Уйимга ўғри тушмаган. ‘Компроматузбънинг бу хабари ёлғон ва мутлақо ноўрин иддао тарқатган. Бунақа миқдордаги маблағга эга ҳам эмасман ва бунча пулим бўлмаган ҳам (кулиб). Бундан илгари ҳам ‘Компроматузб’ ‘Ўқитувчидан чиққан бухоролик ҳоким Тошкентга қайтиш арафасида!’ сарлавҳаси остида ёлғон хабар тарқатган эди. Айни пайтда эса ушбу сайтни судга бериш учун ҳужжатлар тайёрланмоқда», – деди Бухоро шаҳар ҳокими Жамол Носиров.
«Дарё» мухбирининг аниқлик киритишича, Бухоро шаҳар ҳокими 2021 йилнинг 28 декабридан 3 январига қадар Бухоро вилоят юқумли касалликлар шифохонасида даволаниб чиққан.
«Жамол Носиров коронавирус инфекцияси, яъни COVID-19 мусбат ПЗР ташхиси билан даволанди. Касаллик енгил формада кечди. Даволаниш жараёнлари 6 кун давом этди», – деди даволовчи шифокор Шоира Хўжаева.
Ҳокимнинг уйидан 200 минг доллар чиққани ҳақидаги хабар юзасидан «Дарё» мухбири Бухоро шаҳар ИИБ бошлиғи Баҳодирхўжа Шарипов билан телефон орқали боғланди.
«Бухоро шаҳар ҳокими Жамол Носировнинг хонадонида ўғрилик содир бўлмаган. Ички ишлар бошқармаси ва унинг қуйи тизимларига бундай мазмундаги ҳодиса содир бўлганлиги тўғрисида бирор-бир хабар ёки мурожаат келиб тушган эмас.
Худди шунингдек, суриштирувимизга кўра, ҳокимнинг бирор-бир яқин қариндошлари томонидан ҳам бундай жиноий ҳодиса юз берганлиги юзасидан хабар берилмаган. Шу ўринда ижтимоий тармоқ фойдаланувчилари, мустақил журналист ва блогерлардан ҳокимият вакилларини обрўсизлантиришга қаратилган бу каби асослантирилмаган хабар ва маълумотларни тарқатмаслигини сўраб қоламиз», – деди Баҳодирхўжа Шарипов.
Маълумот учун, Жамол Носиров 2021 йил май ойида Бухоро шаҳри ҳокими лавозимига тайинланган. Бундан аввал Носиров маданият вазирининг биринчи ўринбосари ва Бухоро вилоят ҳокими ўринбосари лавозимларида ишлаган.
Изоҳ (0)