Қамчиқ довонида 26 декабрь куни кучли қор ёғиши кузатилмоқда. Бу ҳақда Фавқулодда вазиятлар вазирлиги хабар қилди.
Қайд этилишича, М-39 Гулистон—Бўка—Ангрен—Андижон автомобиль йўлининг Қамчиқ довонидан ўтган қисмида қор ёғган. Ҳозирда йўлни қордан тозалаш ва музламалар ҳосил бўлишининг олдини олиш ишлари давом этмоқда. Бу учун 135 та техника ва 340 нафарга яқин ишчи жалб этилган.
Йўлларда кўриниш 300 метрни, ҳаво ҳарорати -7 даража, намлик 89 фоизни ташкил этмоқда. Шамол тезлиги — 3-8 метр/секунд.
Ўзбекистоннинг аксарият ҳудудларида 26 декабрь куни қор ёғиши кузатилди. Аввалроқ «Ўзгидромет» якшанба куни Ўзбекистонда ҳаво ҳарорати -2 даража совуқдан +3 даража илиққача ўзгариб туриши, Қорақалпоғистон, Хоразм ва Фарғона водийсидан бошқа барча ҳудудларда ёғингарчилик (ёмғир, қор) бўлиши, Тошкентда ёмғир қорга айланиши ҳақида ахборот берганди. Тошкент бўйича прогноз ўзини оқлади, аммо қор Қорақалпоғистон ва Хоразмда ҳам ёғди. Ноқулай об-ҳаво шароити туфайли Тахтақорача довони ёпилди, ИИВ Йўл ҳаракати хавфсизлиги бош бошқармаси ҳайдовчилардан эҳтиёткорликни оширишни сўрамоқда.
Аввалроқ «Ўзгидромет» 26—27 декабрда А-373 Тошкент—Ўш автомобиль йўлининг Қамчиқ довони қисмида қор, вақти-вақти билан кучли қор ёғиши, туман тушиб, кўринувчанлик 50 метргача пасайиши, шамол тезлиги секундига 17-22 метргача кучайиши, йўлда қор уюмлари, яхвонлик ҳосил бўлиши кутилаётганини маълум қилганди.
Эслатиб ўтамиз, Қамчиқ довонида 25 ноябрь ва 19 декабрь кунлари ҳам қор ёғиш ҳолати кузатилганди.
Изоҳ (0)