Сўнгги кунларда Ўзбекистон йўлларида содир бўлган йўл-транспорт ҳодисалари тафсилотларини тақдим этамиз.
Жиззахда Nexia-2 ҳайдовчиси 11 ёшли пиёдани уриб юборди.
Йўл-транспорт ҳодисаси 22 декабрь куни 09:55 атрофида Шароф Рашидов тумани «Олмачи» маҳалласи Кўчатзор кўчасида содир бўлган. Nexia-2 ҳайдовчиси (2001 йилда туғилган) ҳаракатланиш жараёнида йўлнинг белгиланмаган қисмидан кесиб ўтаётган 5-синф ўқувчисини (2010 йилда туғилган) уриб юборган.
Оқибатда вояга етмаган пиёда тан жароҳатлари олиб, республика шошилинч тиббий ёрдам илмий маркази Жиззах филиали жонлантириш бўлимига ётқизилган.
Самарқандда қисқа туташув оқибатида MAN юк машинаси ёниб кетди.
Ҳолат 26 декабрь куни соат 04:00 атрофида Самарқанд шаҳар ҳудудидан ўтувчи М-39 автомобиль йўлининг 1079-километрида содир бўлган. Тошкент—Самарқанд йўналиши бўйлаб ҳаракатланиб келайтган MAN юк автомобилининг юкхонасидаги музлаткичда қисқа туташув юзага келган. Оқибатда ёнғин келиб чиқиб, транспорт воситасининг кабина қисмига ҳам таъсир қилган.
Ёнғин ўт ўчирувчилар томонидан бартараф этилган. Тан жароҳати олган фуқаролар йўқ. Ҳолат юзасидан шаҳар ЙҲХБ ходимлари томонидан суриштирув ишлари олиб борилмоқда.
Қашқадарёда MAN юк автомашинасининг шинасида ёнғин чиқди.
ЙТҲ Қашқадарё вилояти Чироқчи тумани ҳудудидан ўтувчи халқаро аҳамиятга эга А-380 автомобиль йўлининг 45-километрида 26 декабрь куни соат 08:55 атрофида рўй берган. Ҳаракатланиш жараёнида MAN юк машинасининг орқа чап шинасида ёнғин келиб чиққан. Оқибатда машина салони ва кузов қисмлари тўлиқ ёниб кетган.
Ёнғин ўт ўчирувчилар томонидан ўчирилган. Тан жароҳати олганлар йўқ. Ҳолат юзасидан масъул ходимлар томонидан дастлабки суриштирув ишлари олиб борилмоқда.
Изоҳ (0)