Чинозда 1,8 гектар ерни 25 минг долларга ноқонуний сотмоқчи бўлган аёл ушланди

Тошкент вилоятининг Чиноз туманида фермер хўжалигининг ер майдонини фирибгарлик йўли билан 25 минг долларга сотмоқчи бўлган аёл ушланди, деб хабар бермоқда Бош прокуратура ҳузуридаги департамент.

Маълум бўлишича, М.Х. исмли аёл ўзгалар мулкини қўлга киритиш мақсадида фуқаро О.нинг ишончига кириб, у билан «Р.Ф.» фермер хўжалигига тегишли бўлган 1,8 гектар ер майдонини 25 минг долларга сотишга келишган. Олдиндан 10 минг долларни олган вақтида департаментнинг Чиноз туман бўлими ҳамда ДХХнинг Тошкент вилоят бошқармаси томонидан ўтказилган тезкор тадбирда ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.

Тошкент вилояти Бўстонлиқ туманида 5 гектар ерни 150 минг долларга олиб беришни ваъда қилган шахс қўлга олингани, Тошкент вилоятидаги ўрмон хўжалигига қарашли 1 гектар ерни 200 минг доллар эвазига олиб беришни ваъда қилган шахслар ушлангани ҳақида хабар берилган эди.