Ўзбекистон Мудофаа вазирлиги ҳарбий хизматчилари 29 сентябрдан 17 октябрга қадар Буюк Британиянинг Брекон шаҳрида ўтказилган разведка ва махсус бўлинмаларнинг «Кембрия патрули» халқаро мусобақасида иштирок этди. Бу ҳақда вазирлик матбуот хизмати «Дарё»га маълум қилди.
Маълум қилинишича, мусобақада Буюк Британия, Ўзбекистон, Косово, Греция, Ирландия, Германия, Латвия, Франция, Гана, Италия, Ҳиндистон, Польша, АҚШ, Дания, Индонезия, Швейцария, Литва, Нидерландия Қуролли Кучлари разведка ва махсус бўлинмалари ҳарбий хизматчиларидан иборат 103 та жамоа ўзаро баҳс олиб борган.
Мусобақанинг фаол фазаси 14-октябр куни бошланган бўлиб, иштирокчилар 90 километр масофада жойлашган турли даражадаги мураккаб шартлардан ўтиш асносида ҳар 8−10 километрда бир нечта жанговар топшириқларни бажарган.
Шунингдек, ҳарбий хизматчилар зарарланган ҳудуддан ўтиш, жойни разведка қилиш ва тоғ дарёсини кесиб ўтиш, ярадорларга биринчи тиббий ёрдам кўрсатиш, жароҳатланганларни турли йўллар билан эвакуация қилиш, мина тўсиғидан якка ва гуруҳ таркибида ўтиш, душман объектига босқин уюштириш, гаровга олинганларни озод қилиш ва ҳарбий асирларни сўроқ қилиш каби шартдан ҳам ўтган.
Бундан ташқари, жамоаларга 8 та кутилмаган «тест сюрприз» топшириқлари ҳам берилган: хорижий давлатлар қуроллари ва ҳарбий техникаси турларини аниқлаш, симуляция ва алоқа ускуналари ёрдамида артиллерия оловини йўналтириш, ҳарбий топография меъёрларни бажариш, Женева конвенцияси бўйича тест топшириш, разведка бўйича ҳисоботларни тайёрлаш ва тузиш, алоқа тайёргарлиги бўйича меъёрларни бажариш, бажарилган тадбирлар бўйича ва кейинги топшириқларни бажаришга шайлиги бўйича билдирув бериш.
Ўзбекистон Мудофаа вазирлиги жамоаси мусобақада турли мураккаб шартлардан иборат 90 километр масофани 37 соатда босиб ўтган.
Халқаро мусобақа натижаларига кўра, 1-ўринни мезбон давлат — Буюк Британия жамоаси эгаллаган бўлса, иккинчи ўрин Ўзбекистон Мудофаа вазирлиги жамоасига насиб этган. Шоҳсупанинг учинчи поғонасини эса АҚШ жамоаси банд этган.
Эслатиб ўтамиз, 2017 йили Ўзбекистон разведкачилари «Кембрия патрули» мусобақасида 2-ўринни, 2018- ва 2019 йилларда биринчи ўринларни қўлга киритган эди.
Изоҳ (0)