Тизза бўғимининг артрози энг кенг тарқалган ортопедик патологиялардан бири. Бу тизза бўғимларининг сурункали касаллиги бўлиб, тоғайни шикастланиши, ингичкалашиши ва суякни емирилишига олиб келади. Доимий оғриқ синдроми туфайли беморларнинг ҳаёт сифатини сезиларли даражада ёмонлаштиради ва ногиронликни келтириб чиқаради.
Келиб чиқиш сабаблари:
- Генетик мойиллик;
- Шикастланишлар;
- Инсон ёшига мос келмайдиган жисмоний хатти-ҳаракатлар, масалан, ёши кекса одамларга асфальтда югуриш зарар келтиради бу машқ пайтида тизза бўғимига сезиларли босим тушади, дистрофик ўзгарган тоғайларга шикаст етади.
- Ортиқча вазн ва семириш;
- Артрит – тизза бўғимларини яллиғланиши синовиал суюқлик кўпайишига ва унинг сифати бузилишига олиб келади.
- Метоболик касалликлар – масалан, кальций моддасининг етарли эмаслиги суякларда ва тоғайларда дистрофик ўзгаришларга олиб келади.
- Ясси оёқлик – оғирлик марказини силжитади ва бўғимларга нотўғри кучланиш тушади.
- Стресс ва асаб таранглиги – организмда метоболик ўзгаришлар келтириб чиқаради.
Тизза бўғимлари артрозини даволашнинг асосий вазифалари:
- Тоғай ва суякдаги дегенератив жараён ривожланишининг олдини олиш;
- Оғриқ ва реактив яллиғланишни тўхтатиш;
- Бўғимлар функциясини яхшилаш.
Тизза артрозини даволаш кенг қамровли бўлиши керак. Муваффақиятли даволашнинг муҳим шартларидан бири ўз вақтида ташхис қўйиш ва эрта даволашни бошлаш. Бу ремисия муддатини узайтиради, тоғай ва суяк шикастланиши ҳамда тизза бўғимининг деформациясининг олдини олади.
Айтиб ўтиш керакки, бугунги кунда ушбу касалликдан бутунлай халос бўлишнинг иложи йўқ. Фақат юқорида айтиб ўтилган ўзгаришларни камайтириш мумкин. Асосий эътибор тоғай тўқималарини тикловчи дориларга қаратилган, бу жараён узоқ давом этади ва бемордан сабр талаб қилинади, чунки бошқа даволаш муолажалари қисман ёрдам беради ва вақтинчадир. Шунинг учун шифокор билан доимий мулоқотда бўлиб даволаниш энг яхшисидир. Умуман олганда, бу касаллик иккиламчи, яъни бошқа касалликлар фонида пайдо бўлади, масалан, семириш, жароҳатланиш, стресс каби. Буларнинг ҳаммасини шифокор ҳисобга олган ҳолда муолажаларни бошлайди.
Шифокор Хуршид Аъзамхўжаев тавсиялари асосида тайёрланди
Изоҳ (0)