«Ҳоким ҳамда прокуратура органининг захира кадри сифатида 10 миллион сўмдан ошиқ маош оламан» — Шаҳрисабз тумани ҳокими

Қашқадарё вилоятининг Шаҳрисабз тумани ҳокими Самад Ҳасанов ҳокимлиги ва прокуратура органининг захира кадри сифатидаги ишига 10 миллион сўмдан ошиқ маош олишини очиқлади. Бу ҳақда ҳокимнинг журналист ва блогерлар билан мулоқотида маълум қилинди, дея хабар берди «Дарё» мухбири.

Пресс-тур давомида ташкил этилган матбуот анжуманида ҳоким Самад Ҳасанов журналист ва блогерларни қизиқтирган саволларга жавоб берган.

Мулоқотда «Дарё» мухбири ҳокимнинг прокуратура тизимидан чиққанини ва айни кунда ҳам прокуратура тизимининг захира кадри ҳамда ҳоким сифатида қанча маош олиши, ҳокимлик фаолияти давомида неча маротаба жазолангани билан қизиқди.

«Фаолиятимга бир йил бўлди. Ҳозирча жазоланганим йўқ. Аммо раҳбар менинг камчилигимни кўриб, танбеҳ берса ёки жазоласа, бу менинг эртага хулоса қилишимга сабаб бўлди. Шунингдек, давлат раҳбарининг селектор йиғилишларида ёки вилоят ҳокимининг оддий кундалик йиғилишида ҳам Шаҳрисабз туманига ёки менинг фаолиятимга эътироз бўлса, бу — мен учун жазо бўлади. Энг ёмони аҳоли менинг фаолиятимдан қониқмаса ёки мурожаатига ўз вақтида жавоб бермаганим учун эътироз билдирса, бу янаям оғир жазо», — деди туман ҳокими.

Ҳокимнинг маълумот беришича, у прокуратура тизимида 17 йил фаолият юритган.

«Прокурор сифатида 17 йил фаолият юритиб, расман бир маротаба жазоланганман. Аммо кўпчилик сингари оғзаки танбеҳ ва огоҳлантиришлар ҳам олганмиз», — дейди Самад Ҳасанов.

Шаҳрисабз ҳокими саволга жавобан маоши ҳақида ҳам тўхталиб ўтган.

«Прокуратура захира кадри сифатида, шунингдек, ҳоким сифатида Вазирлар Маҳкамасининг қўшимча ойлиги билан 10 миллион сўмдан ошиқроқ маош оламан. Шукрки, маошимиз яхши ва бугунги кундаги оилавий эҳтиёжларимизга етарли. Аммо шу маошни оқлаяпмизми имкон қадар масъулиятли бўлишга, бюджет пулларини оқлашга ҳаракат қиляпмиз. Бунга энди кўпроқ халқ баҳо беради», — деди туман ҳокими журналист ва блогерлар билан мулоқотда.