Бухоро вилоятидаги Олот чегара божхона постида бир пайтнинг ўзида икки ҳолатда ҳужжатларда кўрсатилмаган салкам 701 миллион сўмлик ноқонуний товарлар олиб кирилишига чек қўйилди. Бу ҳақда «Дарё»га вилоят божхона бошқармаси ахборот хизмати раҳбари Жавоҳир Исмоилов хабар берди.
Таъкидланишича, 2021 йилнинг 5 июль куни вилоят Божхона бошқармаси Олот чегара божхона пости ходимлари қўшни давлатдан кириб келган юк автомашинасини белгиланган тартибда божхона назоратидан ўтказган. Бунда божхона кўриги давомида юк кузатув ҳужжатларида кўрсатилмаган, қиймати салкам 439 миллион сўм бўлган металлаштирилган товарлар борлиги аниқланган.Худди шу пайтнинг ўзида мазкур постга кириб келган кейинги юк автомашинаси ҳам белгиланган назоратдан ўтказилганда унда ҳам ноқонуний равишда ортилган ортиқча юклар борлиги аниқланган. Унга кўра, умумий қиймати 262 миллион сўмлик жами 63 номдаги 1161 дона авто эҳтиёт қисмлар юк кузатув ҳужжатларида кўрсатилмаган бўлган.
«Чегара божхона постларида чап бериб ўтиш мақсадини кўзлаганлар хато қилишади. Ҳар бир ноқонуний хатти-ҳаракатга яраша жазо чоралари мавжуд. Бир пайтнинг ўзида содир бўлган ҳар икки ҳолатда салкам 701 миллион сўмлик ортиқча ва яширин юкланган товарларнинг олиб кирилишига чек қўйилди. Ҳозирда мазкур ҳолатлар юзасидан суриштирув ишлари давом эттирилмоқда», — дейди Жавоҳир Исмоилов.
Изоҳ (0)