Турк актёрлари Энгин ва Толга иштирокидаги «Оқ йўл» номли янги лойиҳанинг суратга олиш ишлари бошланди.

Турк киносаноатида ўз ўрнига эга бўлган Энгин Акюрек ва Толга Сариташ ўзига хос ижроси, услуби ва кўриниши билан бир-биридан фарқ қилади. Продюсерлар ишига турли ёндашадиган ва темпераменти фарқли бўлган актёрларнинг бир лойиҳада иштирок этиши қизиқарли бўлишига ишонган.

Актёрларни суратга тушишга таклиф қилган ижодкорлар уларнинг розилигини олишга муваффақ бўлган. Netflix платформаси учун суратга олинаётган лойиҳанинг суратга олиш ишлари бошлангани ҳақида продюсерлик компаниясининг сайти Lanistar Medya’да эълон қилинган. «Еттинчи бўлмадаги мўъжиза» фильми билан яхши таниш бўлган Меҳмет Ўзтекин лойиҳага режиссёрлик қилади.

Ижтимоий тармоқдаги саҳифасида жанг саҳналари бўлишини таъкидлаган режиссёр, батафсил маълумот бермасликни афзал билган. Энгин ва Толганинг биргаликда суратга тушиши турк киносаноатидаги танқидчилар орасида шов-шувлар келиб чиқишига сабаб бўлган. Актёрларнинг ўзи суратга олиш жараёнларига изоҳ бермаган, аммо лойиҳа ижодкорлари ОАВ учун конференция ташкил қилишга ваъда берган.