Telegram мессенжери асосчиси Павел Дуровнинг фарзандлари биринчи марта Forbes журналининг энг бой меросхўрлар рейтингига киритилди.
Forbes Дуровнинг бойлигини 17,2 миллиард долларга баҳолаган, бундан келиб чиқиб унинг ҳар иккала фарзандига (қизи ва ўғли) 8,6 миллиард доллардан «потенциал мерос» тўғри келади. Дуровнинг фарзандлари дарҳол рейтингнинг олтинчи қаторидан жой олди. Forbes Дуровнинг болалари киритилган янги таҳрирни 28 май куни веб-сайтда нашр этишни ваъда қилган.
Мерос ҳажми бўйича рейтингда миллиардерларнинг фарзандлари орасида «Лукойл» раҳбари Вагит Алекперовнинг ўғли Юсуф 18 миллиард доллар билан биринчи ўринни эгаллаб турибди.
2021 йил апрель ойида Forbes миллиардерларнинг йиллик жаҳон рейтинги янги таҳририда Дуровни Бирлашган Араб Амирликларининг (БАА) энг бой ишбилармонлари орасида биринчи ўринга қўйган эди. 2021 йилги рейтингда Дуровнинг бойлиги 17,2 миллиард долларга баҳоланди, бу ўтган йилга нисбатан 13,8 миллиард долларга кўп.
Бироқ бир неча кундан сўнг нашр Павел Дуровни Бирлашган Араб Амирликларининг миллиардерлар рўйхатидан чиқариб, Россия рўйхатига кўчириб ўтказди. У «Нафта Москва» асосчиси ва «Полюс» олтин қазиб олиш компаниясининг назорат пакетига эгалик қилувчи Сулаймон Керимов оиласини ортда қолдириб, россиялик миллиардерлар рўйхатида тўққизинчи ўринни эгаллади.
Forbes бўйича сайёрадаги энг бой одамларнинг умумий рўйхатида Дуров 112-ўринда турибди. Бир йил давомида унинг бойлиги 13,8 миллиард долларга ўсган.
Изоҳ (0)