Шимолий Корея раҳбари Ким Чен Ин дунёда коронавируснинг кенг тарқалаётганидан хавотирда экани сабабли ўзининг оммавий тадбирлардаги иштирокини қисқартирди. Бу ҳақда икки Кореяни бирлаштириш бўйича вазирлик вакилига таяниб Yonhap агентлиги хабар берди, деб ёзмоқда «Интерфакс».
Ким Чен Ин.
Фото: Корея Марказий телеграф агентлиги
«2020—2021 йилда коронавируснинг тарқалиши муносабати билан Ким Чен Иннинг жамоат фаолиятида пасайиш тенденцияси кузатилди. Унинг партия қурултойи каби кенг кўламли сиёсий тадбирларда иштирок этиши бундан мустасно», — деб хабар берди вазирлик вакили журналистларга номини ошкор қилинмаслик шарти билан.
Таъкидланишича, яқинда КХДР раҳбари, тахминан, 20 кун давомида жамоатчилик эътиборидан четда қолди.
Агентликка хабар берган вакилнинг сўзларига кўра, давлат раҳбарининг охирги пайтларда жамоатчиликка кўриниш бермаганининг сабабини айтишга ҳали эрта, лекин вазирлик тегишли вазиятларни диққат билан кузатиб боради.
Эслатиб ўтамиз, 2020 йилнинг май ойида CNN телеканали АҚШнинг КХДР етакчиси Ким Чен Иннинг соғлиғи жарроҳлик амалиётидан сўнг ёмонлашгани тўғрисидаги разведка маълумотларини ўрганаётганини маълум қилганди. Daily NK’нинг ёзишича, Ким Чен Инда 12 апрель куни юрак-қон томир тизимига боғлиқ жарроҳлик амалиёти ўтказилган. Бироқ АҚШ собиқ президенти Дональд Трамп Ким Чен Иннинг соғлиғи ёмонлашгани тўғрисидаги маълумотлар хато эканлигини билдириб, CNN’га доим ҳам ишонавермаслигини айтган. 27 апрель куни Жанубий Корея президенти маслаҳатчиси КХДР етакчиси соппа-соғ эканлигини маълум қилган.
Аввалроқ Ким Чен Ин мамлакатдаги вазият ҳар қачонгидан ҳам ёмонроқ эканини тан олган эди. Шимолий Корея раҳбари партиянинг қуйи синфларини аниқланмаган «камчиликлар» учун танқид қилди ва партия барқарор ҳамда соғлом ривожланиши учун уларни зудлик билан тузатишга чақирди.
Февраль ойида Ким Чен Ин ҳукуматни мамлакатдаги иқтисодий таназзуллар учун танқид қилган ва бош иқтисодчини иқтисодиётни сақлаб қолиш учун янги ғоялар таклиф қилмагани сабабли ишдан бўшатган эди.
