«Реал» ва «Барселона»нинг 6 йиллик гегемонлиги тугади. «Атлетико» 11-бор Испания чемпиони бўлди

Испания Ла Лигасининг 2020/21 йилги мавсуми якунланди.

Мадриднинг «Атлетико» клуби 38-турда «Вальядолид»ни мағлуб этиб (2:1), 11-марта Испания чемпионига айланди.

Жамоани 2011 йилнинг декабрь ойида қабул қилиб олган мураббий Диего Симеоне учун бу Ла Лигадаги 2-соврин бўлди (умумий совринлар сони эса 8 та). Аргентиналик мутахассис бунгача «Атлетико»ни 2013/14 йилги мавсумда ҳам чемпион қилганди. Симеоне футболчи сифатида 1996 йилда «матрасчилар» билан чемпионликни қўлга киритган.

Қайд этиш жоиз, сўнгги 6 мавсум давомида Ла Лигада фақат «Реал» ва «Барселона» чемпионликни қўлга киритиб келаётганди: мадридликлар икки марта, каталон клуби эса 4 марта.

2020/21 йилги мавсумда Ла Лигада иккинчи ўринни «Реал» эгаллади, кучли учликка «Барселона» якун ясаб берди. Тўртинчи поғона эса «Севилья»га насиб этди. «Реал Сосьедад» ва «Бетис» келаси мавсумда Европа Лигасида ўйнайди.

«Атлетико» Ла Лигадаги совринлар бўйича фақат «Реал» (34) ва «Барселона»дан (26) ортда қолмоқда.