Чўл ўртасидаги икки юрак: БААдаги Севги кўлига саёҳат

Дубайдан 50 км узоқликда Севги кўли жойлашган. Ал-Қудра чўли ўртасидаги мазкур кўлнинг кўриниши туташган икки юрак шаклини эсга солади.

Дубайда диққатга сазовор жойлар бисёр: палма шаклидаги орол, машҳур Бурж Халифа ва елкан шаклидаги ҳашаматли Бурж Ал Араб меҳмонхонаси. Аммо пайдо бўлганига бир неча йил бўлишига қарамай, Севги кўли ташриф буюрувчиларнинг эътиборидан четда қолади.

Севги кўли 2018 йилда чўлнинг қоқ ўртасида пайдо бўлган.

Кўл бир-бири билан туташган икки юрак шаклини эсга солади.

Юракларнинг четлари сув билан тўлдирилган, марказда эса оролчалар қолдирилган. Унинг атрофида йўлак ва дарахтлар борлигини кўриш мумкин.

Ушбу гўзалликдан баҳра олиш учун юқорига кўтарилиш керак.

Чунки пастдан қаралганда оддий ҳовуз ва буталардан иборат манзара кўринади, холос.

Аслида, чўл ўртасида сувни кўриш ҳам кишини ҳайратга солишига шубҳа йўқ.

Бу ерда 16 мингта дарахт ва бута, бундан ташқари, минглаб ўсимликларни учратиш мумкин.

Юраклар йўналиши бўйлаб экилган ўсимликлар юқоридан қараганда кўринмайди.

Мазкур воҳадаги гулзор, ҳовуз ва ҳатто ўйин майдони ҳам юрак шаклида.

Атроф эса қумлардан иборат.