Андижон шаҳрида авиакасса биносидан катта миқдорда пул ўғирлаган шахс ушланди, дея хабар бермоқда Тергов департаменти.
Маълум қилинишича, 2021 йилнинг 2 май куни соат 02:30 ларда номаълум шахс Андижон шаҳри Бобуршоҳ кўчасида жойлашган авиакасса биносига дераза орқали кириб, бинодаги темир сейф ичидан жамиятга тегишли 92 221 000 сўм пулларни ўғирлаб, ҳодиса жойидан яширинган.
Олиб борилган тезкор қидирув ҳаракатлари давомида ушбу жиноятни автомашина устаси 25 ёшли Х.О. содир этганлиги аниқланиб, ундан 36 600 000 сўм пуллар ашёвий далил тариқасида расмийлаштириб олинган.
Мазкур ҳолат юзасидан Андижон шаҳри бўйича ИИО ФМБ ҳузуридаги тергов бўлими томонидан Х.О.га нисбатан Жиноят кодексининг 169-моддаси 3-қисми «в» банди (ўғрилик) билан жиноят иши қўзғатилиб, қамоққа олиш тарзидаги эҳтиёт чораси қўлланилган.
Тергов ҳаракатлари давомида Х.О. ўз кўрсатувида галлюцинацияга олиб келувчи таблеткалар таъсири остида ушбу жиноятни содир қилганлигини маълум қилган. Х.О.нинг қон намуналари олиниб, тегишли экспертизалар тайинланган.
Жиноят иши доирасида барча ҳолатларга ҳуқуқий баҳо берилиши таъминланиши таъкидланган.
Бундан аввал Фарғонада собиқ куёв қайнонасининг машинасини олиб қочгани, биринчи ўзбек космонавти таъсисчилигидаги компанияга алоқадор жиноят иши Тергов департаментининг алоҳида назоратига олингани ҳамда Самарқандда 15 сотих ерни фирибгарлик йўли билан 10 минг долларга сотмоқчи бўлган шахс ушлангани ҳақида хабар берилган эди.
Изоҳ (0)