Фарғона шаҳрида қайнонасининг машинасини олиб қочган собиқ куёв ушланди, дея хабар бермоқда Тергов департаменти.
Маълум қилинишича, 2021 йилнинг 29 апрель куни Фарғона шаҳри бўйича ИИО ФМБга 48 ёшли Э.Ў. исмли аёл ариза билан мурожаат қилиб, унда шу куни соат 09:30 ларда Фарғона шаҳри Марғилон кўчасида жойлашган яшаш хонадонида турган, ўзига тегишли Nexia-3 русумли автомашинасини собиқ куёви 30 ёшли А.И. олиб қочганини, автомашинасини топиб, А.И.га нисбатан қонуний чора кўришни сўраган.
Олиб борилган тезкор-қидирув ҳаракатлари давомида фуқаро Э.Ў.га тегишли Nexia-3 русумли автомашина Фарғона тумани «Оқбилол» маҳалласи ҳудудидаги дала ер майдонига ташлаб кетилганлиги аниқланиб, А.И. процессуал тартибда ушланган.
Мазкур ҳолат юзасидан Фарғона шаҳри бўйича ИИО ФМБ ҳузуридаги тергов бўлими томонидан А.И.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.
Тергов ҳаракатлари давомида собиқ куёв А.И. оилавий муаммолари туфайли ушбу жиноятни содир қилганлиги аниқланган. Ҳозирда тергов давом этмоқда.
Бундан аввал Қашқадарёда ҳомиладор хотини, қайнонаси ва икки нафар болани пичоқлаб ўлдирган эркак умрбод қамоқ жазосига ҳукм қилингани, Самарқандда собиқ турмуш ўртоғининг уйига фарзандини кўришга келган эркак қайнонасини ўроқ билан уриб ўлдиргани ҳамда Наманганда алимент талаб қилинганидан дарғазаб куёв собиқ қайнотасини ўлдириб, уйини ёқиб юборгани ҳақида хабар берилганди.
Изоҳ (0)