Сут, нон ва анчадан бери туриб қолган бошқа маҳсулотларни ташлаб юборишга шошилманг. Қуйидаги тавсияларга риоя қилиб, мазали егулик ва таомлар тайёрлаб кўринг.
Сут ва сут маҳсулотлари
Қуймоқ ва оладе тайёрлаш учун туриб қолган сутдан яхшиси йўқ. Музлаткич ҳиди ўтириб қолган сариёғни эса эритиб, банкага солиб қўйиш керак. Ундан қуймоқ ва тухум қовуришда фойдаланиш мумкин.
Нон ва нон маҳсулотлари
Суви қочган нонни бўлакларга бўлиб, туз ва зираворлар сепинг ҳамда печга солиб пиширинг. Унинг ўзини эрмак қилиб ейиш ёки салатларга қўшиш мумкин.
Консерваланган гўшт
Аввало, ушбу маҳсулотдан яроқлилик муддати тугаши арафасидаги бир ой ичида фойдаланиш кераклигини эсда тутиш керак. Ундан шўрва тайёрлаш ёки печда картошка ва сабзавотларга қўшиб пишириш мумкин. Иложи борича, узоқроқ пишгани яхши.
Консерваланган балиқ
Ҳиди ўзгармаган бўлса, консерваланган балиқдан мазали шўрва тайёрласангиз бўлади. Томат ва кўкатлар қўшсангиз, янада ўзига хос бўлади.
Консерваланган сабзавотлар
Яроқлилик муддати тугаганидан кейин ушбу маҳсулотдан фойдаланмаган яхши. Яшил нўхатдан шўрва, ловиядан ши шўрваси, сабзавотли икрани эса қайта қайнатиб, соус тайёрлашингиз мумкин.
Ёрмалар
Ёрмаларнинг ранги ва ҳиди ўзгариши мумкин. Ишлатишдан олдин яхшилаб тозалаш, қурт тушмаганига амин бўлиш керак.
Уй бекаларига эслатма:
- Гуручга бир ош қошиқ сирка қўшиб пиширилса, ҳидлангани билинмайди.
- Қайнатилган гречкага гўшт, кўкатлар қўшиб, уй шароитида колбаса тайёрласа бўлади.
- Сули ёрмасининг тахир таъми кетиши учун пиширишдан аввал тузли сувга ивитиб қўйинг.
- Макаронларга қийма, томат ва сабзавот қўшиб, запеканка тайёрланг.
- Қуюлтирилган сутдан эса мураббо тайёрласа бўлади.
Музлатиш камераси яхши аҳволда бўлса ва ортиқча ҳидлар тўпланмаса, маҳсулотларни музлатиб, узоқ муддат сақласа бўлади, айнимайди. Ишлаб чиқарилган маҳсулотларни бир йил, мева ва сабзавотларни эса 2—3 йил давомида сақласа бўлади. Гўшт ва балиқни эса бир йил ичида истеъмол қилган яхши.
Изоҳ (0)