Видео: Таниб бўлмас аҳволга келиб қолган ўйинчоқ Ferrari’ни қайта тиклаш жараёни

YouTube’даги Restore Machines каналида таниб бўлмас аҳволга келиб қолган Ferrari LaFerrari ўйинчоқ моделини реставрация қилиш жараёни тасвирланган видео пайдо бўлди.

Деярли умидсиз автомобиллар моделларини «қайта тирилтириш»га ихтисослашган Restore Machines устаси биринчи навбатда LaFerrari’ни қисмларга ажратиб чиққан. Кузов панеллари ва бошқа йирик деталларини чиқариб олиб, тозалаган, силлиқлаган ва аэрограф билан бўяган. Пружина ва винтлар зангини кетказиш учун махсус эритмага солинган.

Шундан сўнг машинанинг таг қисми ва бошқа эгилган эҳтиёт қисмлари бироз қиздирилиб, имкон қадар олдинги шаклга қайтарилган. Ярим куйган орқа суянчиқ омон қолган ўриндиқ ёрдамида қайта тикланган. Бу каби усул орқали у фаралардан бирини ҳам тайёрлаган.

Бошқа янги эҳтиёт қисмлари қаторидан радиатор панжараси, ойна ва кузовдаги ёрлиқ ўрин олган. Бундан ташқари, эриб кетган «покришка»лар ўрнига янгиси ўрнатилган: уста уни Lamborghini Aventador’дан олиб турган.

Натижада LaFerrari «янги ҳаёт»га қайтган. Эътиборли жиҳати ушбу модель у қадар катта қийматга эга эмас: Amazon орқали 2 минг рублга (26 доллар) харид қилиш мумкин.

Аввалроқ америкалик эркак қордан Ford Bronco’нинг ҳақиқий ўлчамидек келадиган нусхасини ясагани тўғрисида хабар берилганди.