Кувайт тарихида биринчи марта суд собиқ бош вазир ва ҳукмрон шайхнинг оила аъзоси Жобир ал-Муборак ал-Ҳамад ас-Сабоҳни қамоққа олиш тўғрисида қарор чиқарди. Бу ҳақда Reuters хабар берди.
Хорижий ОАВга бу масала юзасидан ҳеч қандай маълумот ошкор қилинмаяпти. Кувайтнинг ўзида эса ушбу иш билан боғлиқ ҳар қандай нашрга қатъий тақиқ қўйилди. Кейинги суд мажлиси 27 апрель куни ўтказилади.
Ҳукумат вакили суд қарорига изоҳ бермади.
Собиқ бош вазирга нисбатан 2018 йилнинг ноябрь ойида жиноий иш очилган эди. Ас-Сабоҳ армия жамғармасидан 790 миллион доллар миқдоридаги маблағни талон-торож қилганликда айбланиб, натижада 2019 йилда лавозимидан истеъфога чиққан. Ас-Сабоҳ 2011 йилда бош вазир лавозимини эгаллаган эди.
Аввалроқ Ироқ Қуролли Кучлари ИШИД етакчиларидан бири — «Дажла амири»ни қўлга олди. Шунингдек, разведка ходимлари учта мотоцикл ва жангарилар томонидан эгалланган туннелни йўқ қилган. Террорчилик ташкилоти янги раҳбарининг қўлга олингани ҳақида бошқа тафсилотлар берилмаган.
Гондурасда эса президентнинг укаси Хуан Антонио Эрнандес эса наркотик моддаларнинг ноқонуний савдоси учун АҚШда бир умрлик қамоқ жазосига ҳукм қилингани ҳақида хабар берилди. 2019 йилнинг октябрь ойида Эрнандес наркотик моддаларнинг ноқонуний савдосига алоқадорликда айбдор деб топилган. Унга энг камида 40 йиллик қамоқ жазоси хавф солаётган эди, лекин прокуратура бир умрлик қамоқ жазоси белгиланишини талаб қилди.
Изоҳ (0)