ОАВ: 1,3 миллион Clubhouse фойдаланувчиларининг маълумотлари интернетга тарқалиб кетди

Clubhouse ижтимоий тармоғининг 1,3 миллион фойдаланувчисига тегишли маълумотлар ошкор бўлди. Бу ҳақда CyberNews портали хабар берди.

Портал хабарига кўра, Clubhouse фойдаланувчиларининг маълумотлари машҳур хакерлик форумида бепул кўринишда пайдо бўлган. Хусусан, маълумотлар базасида ҳисоб ёзувларида кўрсатилган исмлар мавжуд. Бундан ташқари, унда фойдаланувчиларнинг суратларига ҳаволалар, уларнинг Twitter ва Instagram аккаунтлари, шунингдек, фойдаланувчининг Clubhouse’дан рўйхатдан ўтганида тармоққа ким томонидан таклиф қилингани ҳақида маълумотлар бор.

CyberNews’нинг таъкидлашича, тарқалган маълумотлар ҳеч қандай махфийликни ўз ичига олмайди, (масалан, кредит карталари каби) лекин улар хакерлик ҳужумларини амалга ошириш учун етарли бўлиши мумкин. «Бошқаларнинг номидан батафсил профиллар яратиш учун, хакерлар ушбу маълумотларни бошқалари билан бирлаштириши мумкин. Бундай маълумотларга эгалик қилиб, улар анча жиддий ҳужумлар уюштира олади», — деб ёзган портал.

Апрель ойининг бошида Business Insider нашри 530 миллион Facebook фойдаланувчиларига тегишли телефон рақамлар, исм-фамилиялар, туғилган саналар ва электрон почта манзилларининг тармоққа чиқиб кетгани ҳақида хабар берган эди. Бундан дунёнинг 106 мамлакати, хусусан, АҚШнинг 32 миллион, Буюк Британиянинг 11 миллион, Ҳиндистоннинг 6 миллион аҳолиси зарар кўрди. The Sun нашрининг ёзишича, ижтимоий тармоқ асосчиси Марк Цукербергнинг фойдаланувчи идентификатори, телефон рақами, манзили, никоҳи ҳақидаги маълумотлари ҳам тармоққа чиқиб кетган. Facebook’нинг хабар қилишича, хакерлар ушбу маълумотларни 2019 йил контактларнинг импорти туфайли фойдаланувчи аккаунтларидан чиқариб олган.

Бир ҳафта ўтгач, CyberNews 500 миллион LinkedIn фойдаланувчиларининг маълумотлари тармоқда тарқалгани ҳақида хабар берди. Хакерлар томонидан сотувга қўйилган архивда фойдаланувчиларнинг идентификаторлари, исмлари, почта манзиллари, телефон рақамлари ва бошқа ижтимоий тармоқлардаги саҳифаларига ҳаволалар мавжуд бўлган. Маълумот кимошди савдосида «тўрт хонали нархга» сотилган, эҳтимол, биткоинга бўлиши мумкин. LinkedIn маълумотларнинг тарқалганини рад этди ва ошкор қилинган маълумотлар омма учун очиқ бўлганини айтди.