RS Success Agro компанияси Ховос тумани чўлларини яшил далаларга айлантирмоқда, яъни техник каннабис экиш кампанияси олиб бормоқда. Айтиш жоизки, корхона учун ажратилган бу ерлар авваллари шўр босган чўл зонаси эди.
Бир неча ойдан сўнг худди шу ҳудудда мустақил Ўзбекистон тарихидаги биринчи техник каннабис ҳосили йиғиб олинади. Ушбу экин анча йиллардан буён бутун жаҳонга машҳур ўсимликлардан бири бўлиб, турли соҳаларда қўлланилади ва кўплаб мамлакатлар иқтисодиётида муҳим аҳамиятга эга.
«2021 йилги экиш мавсуми учун ҳозирча Европадан келиб чиққан уруғлар қўлланмоқда. Келгусида RS Success Agro компанияси тетрагидроканнабинол (ТГК) миқдори энг паст даражадаги ўз уруғларини етиштиришга бел боғлаган. Бизда етиштирилган техник каннабис уруғи таркибидаги тетрагидроканнабинол қонунда белгиланган меъёрдан анча кам бўлади. Минимал ТГКли юқори маҳсулдор каннабис штаммларини кўпайтириш компания селексионерларининг устувор вазифасидир. Шу мақсадда RS Success Agro Ўзбекистонда каннабис маҳсулотларининг сертификатланган ва илмий тадқиқотларга мўлжалланган биринчи саноат лабораториясини яратди. Айни пайтда ҳар бир экилган навнинг салоҳияти, унинг маҳаллий иқлимга мослашиши ва олинган хомашё сифати ўрганилмоқда»,— дейди RS Success Agro бош директори Робия Ибрагимова.
«Ақлли» агротехнологиялар — мўл ҳосил гарови
Экин экиш тадбирларини ўз вақтида якунлаш каннабис уруғи ва толасининг юқори ҳосилдорлигини таъминлайди. Шу боис далаларга юксак самарадор янги техникалар олиб келинди. Компания ходимларининг вазифаси битта техника билан 24 соатлик сменада, 100 гектар майдонга уруғ қадашдир.
RS Success Agro компанияси IoT тизимини биотехнологик индустриал агромажмуа фаолиятига татбиқ этган. Бу тизим компаниянинг нафақат Ўзбекистон, балки бутун жаҳонда етакчи ўринни эгаллашига имкон беради. Мазкур тизим экин етиштириш жараёнининг тўлиқ назорат қилинишини таъминлайди. Датчиклар ва сунъий йўлдош алоқаси орқали ускунанинг муайян бир вақтда қаердалигини ва қандай иш билан шуғулланаётганини кўриш мумкин.
«Компания мутахассислари бу жараённи имкон қадар автоматлаштиришга ҳаракат қилишмоқда. Агромажмуамиз барча жараённи IT ечимларга асослаган ва бу Ўзбекистон қишлоқ хўжалигида мутлақо янгича ёндашувни акс эттиради. Бизнинг усул моддий, техник ресурслар ва энергия харажатларини сезиларли даражада тежашга хизмат қилиб, бизнес жараёнларининг шаффофлигини ва маҳсулот хавфсизлигини таъминлайди», — деб қайд этди Робия Ибрагимова.
RS Success Agro биотехнологик индустриал агромажмуаси ўз метеорологик станциясига эга. Станция февраль ойи охирида Ўзбекистонга кириб келадиган совуқ ҳаво оқими тўғрисида аввалдан билиш ва экиш кампаниясини кейинга қолдириш имконини берди. Далаларга ўрнатилган датчиклар тупроқ намлиги ҳамда ҳарорати кўрсаткичларини баҳолашда муҳим рол ўйнади.
RS Success Agro Ховос чўлларини яшил майдонга айлантирмоқда
RS Success Agro компанияси экинлар учун ажратилган ер бир неча ўн йиллар давомида ишлов берилмаган, унумдорлиги йўқ, деб топилган эди. Шу боис дала майдонларини бегона ўтлардан тозалаш, йиллар давомида ҳосил бўлган тепалик ва тешикларни текислаш керак бўлди. Ернинг аввалги кучини қайтариш учун 25 миллион бегона чўл ўтлари олиб ташланиб, 18 миллион куб метр ер ётқизилди.
Орадан бир неча ой ўтгач, Ховоснинг собиқ чўл ерлари техник каннабис экилган яшил майдонларга айланади
Агрономлар дуч келадиган асосий муаммолардан бири — бу Ховос ҳудудларининг шўрланиши. Сўнгги йилларда ушбу ҳудудда ёғингарчилик жуда кам бўлгани туфайли тупроқни ювиш имкони бўлмаган. Шу боис ер ости томчилатиб суғоришни жорий этиш зарур қувватни тиклашнинг энг самарали усули бўлди. Ушбу инновацион технология Ўзбекистон қишлоқ хўжалиги соҳасини янги босқичга олиб чиқиш имконини беради. Бу ер унумдорлигини тиклаш, ҳар бир томчи сувни тежаш ва ҳосилдорликни сезиларли даражада ошириш деганидир.
Техник каннабис тупроққа етарлича чуқур кириб борувчи илдиз тизимига эга. Аммо маълум бир чуқурликда жойлашган ер ости томчилатиб суғориш усули туфайли ўсимлик илдизи узоққа кетмайди, балки белгиланган чуқурликда керакли миқдордаги намлик ва минералларни ўзига сингдиради. Шундай қилиб, инновацион агротехника тадбирлари туфайли тупроқнинг юқори қатламларидаги туз ўсимликдан ажратиб олиниб, қуйи туз қатламлари томчилатиб суғориш тизими остида қолади ва илдизга ривожланиш учун қулай муҳит яратилади.
Агрономлар таъкидлаганидек, қулай об-ҳаво шароити (илиқ ҳарорат ва меъёрий намлик)да техник каннабиснинг илк ниҳоллари етти кун ичида униб чиқади. RS Success Agro биотехнологик индустриал агромажмуасида узлуксиз ишлаб чиқариш занжири ташкил этилган. У бир вақтнинг ўзида бир неча ишлаб чиқариш турини қамраб олади. Совуқ пресслаш усулида ёғ олиш, техник каннабис ёғини бутилкалаш, тола, арболит ва озуқа ишлаб чиқариш каби имкониятлар шулар жумласидандир.
Реклама ҳуқуқи асосида.
Изоҳ (0)