Жанубий Корея президенти Мун Чжэ Ин давлат Ер ва уй-жой корпорацияси ходимлари қатнашган ер спекуляцияси можароси учун мамлакат фуқароларидан узр сўради. Давлат раҳбари мазкур баёнотни ҳукуматнинг навбатдаги ҳафталик йиғилишида берди. Бу ҳақда «ТАСС» хабар берди.

«Одамларда ихлос қайтиши ва умидсизлик ҳисси пайдо бўлишига олиб келган ушбу жанжал бошланганидан жуда афсусдаман», — деди Мун Чжэ Ин. Шу муносабат билан у давлат хизматчилари орасида коррупцияга қарши курашни кучайтиришга ваъда берди.

«Кўчмас мулк билан боғлиқ бўлган, чуқур илдиз отган ноҳақликни йўқ қилиш адолатли жамият қуриш йўлидаги бурилиш нуқтаси бўлади», — дея таъкидлади президент. Шунингдек, у давлат хизматчиларининг ахлоқий меъёрларини оширишдан бошлаш орқали муассасаларни тубдан ислоҳ қилиш зарурлигини эътироф этди.

Аввалроқ Миллий ер ва уй-жой корпорациясининг энг камида 20 нафар ходими у ерда кенг кўламли қурилиш режалаштирилгани тўғрисида расмий маълумотларга эга бўлган ҳолда пойтахт ҳудудида ўзлаштирилмаган ер участкаларига эга бўлган эди. Сўнгги йилларда мамлакатнинг барча минтақаларида уй-жой нархи ва ижара ҳақи кескин кўтарилиб кетгани низони янада кучайтирди.