Наманганда 200 дона 100 долларлик қалбаки купюрани муомалага киритмоқчи бўлган шахслар ушланди

Наманганда сохта купюраларни сотаётган шахслар қўлга олинди. Бу ҳақда «Замон» дастурида маълум қилинди.

Таъкидланишича, 2021 йил февраль куни Иқтисодий жиноятларга қарши курашиш департаменти бошқармаси ва Давлат хавфсизлик хизмати ходимлари томонидан ўтказилган тезкор тадбир давомида сохта пулни муомалага чиқариш пайида бўлган фуқаролар аниқланди.

Аниқланишича, Қирғизистон фуқароси Н.Б. Тўрақўрғон туманида яшовчи Х.С. билан жиноий тил бириктириб, 100 АҚШ доллари бўлган жами 200 дона қалбаки купюрани 9000 минг АҚШ долларига сотаётган вақтида ушланган.

Суд мазкур ҳолат юзасидан мавжуд далиллар ва гувоҳларнинг кўрсатмаларини тинглаб, Н.Б. ва Х.С.га нисбатан Жиноят кодексининг 223-моддаси ҳамда 176-моддалари билан айбдор деб топиб, озодликдан маҳрум қилиш жазоси тайинланди.

Иш бўйича далилий ашё тариқасида олинган қалбаки пулларни тегишли тартибда йўқ қилиш таъминланди.

Бундан аввал Тошкентда тўйда сочиш учун юзта 100 минг сўмлик купюра ясаган шахсларга жиноят иши қўзғатилгани, Шайхонтоҳурда қалбаки 50 минг сўмлик купюраларни ишлаб чиқариш билан шуғулланган хонадон фаолияти фош этилгани ҳамда Наманганда 50 минг ва 100 минг сўмлик купюраларни қалбакилаштирганлар ушлангани ҳақида хабар берилганди.