Янги Зеландиянинг Окленд шаҳрида олти ой ичида биринчи марта COVID-19’га чалиниш бўйича учта ҳолат аниқлангани учун карантин жорий қилинди. Бу ҳақда мамлакат бош вазири Жасинда Ардернга таяниб «Korrespondent.net» хабар берди.
«Мен Янги Зеландия халқидан кейинчалик ҳам кучли ва иродали бўлишини сўрайман. Биламан, бу содир бўлганда биз ўзимизни ёлғиз ҳис қиламиз. Барчамизда ‘яна такрорланмасин’ деган хавотир бор. Лекин унутманг, буни аввал ҳам енгиб ўтганмиз, бу сафар ҳам ушбу синовлардан фақат биргаликда ўтишимиз мумкинлигини яхши биламиз», — дея таъкидлади Ардерн.
Янги Зеландия сўнгги олти ой ичида биринчи марта карантин жорий этди. Аввалроқ мамлакат эпидемияга қарши курашнинг муваффақият намунаси эди, чунки у коронавирус тарқалишини тўхтата олди. Мамлакатда катта концертлар ва оммавий спорт тадбирлари қайта тикланди, шунингдек, мажбурий хавфсизлик талаблари олиб ташланди.
Эндиликда Окленд шаҳрида 14 февраль, якшанба куни тундан бошлаб карантин жорий қилинди. Мамлакатнинг бошқа ҳудудларида хавфсизлик чоралари кучайтирилади, лекин ҳозирча қатъий карантин жорий қилинмайди.
Маълумот учун, дунёда коронавирусга чалинганлар сони 109 миллиондан ошди ва 2,4 миллион киши вирус қурбонига айланди.
Мавзуга доир:
- Янги Зеландияда икки ой ичида биринчи марта коронавирусга чалиниш ҳолати аниқланди
- Австралияда коронавирус қурбонлари сони бўйича кунлик антирекорд ўрнатилди. Янги Зеландияда COVID-19 сабабли парламент сайлови кечиктирилди
- Янги Зеландиядаги парламент сайловларида мамлакат бош вазири Жасинда Ардерн партияси ғолиб бўлди
Изоҳ (0)