Фото: Давлат раҳбарига айланган актёрлар

Юқори лавозим эгаларининг аксарияти аввал умуман бошқа касб билан шуғулланган бўлади. Аммо бир неча давлат президентлари сиёсий фаолиятини бошламасидан аввал шоу-бизнесда карьерасини шакллантирган. Улар бир неча фильм ва сериалларда рол ижро этган, айримлари эса фильм ҳам суратга олган.

Владимир Зеленский – Украина

Маълумотларга кўра, Зеленскийнинг сиёсатда тажрибаси етарли эмас. У шоу-бизнесда карьерасини ривожлантирган. Талабалик йилларидаёқ бир неча қизиқарли шоу-дастурлар – КВНда чиқишлар қилган. У бир неча гуруҳлардан сўнг ўз жамоаси аъзолари билан «Кечки квартал» телевизион лойиҳасида иштирок этган. Шунингдек, «Жанг клуби», «Жаноб Кук», «Йил қўшиғи», «Кулги лигаси» ва бошқа дастурларда бошловчилик ҳам қилган. Бундан ташқари, у бир қатор фильм ва мусиқий фильмларнинг сценарий муаллифи, актёри ва продюсери ҳам ҳисобланади. Уларнинг энг машҳурлари – «Совчилар», «Катта шаҳардаги муҳаббат», «8 та биринчи учрашув», «8 та янги учрашув», «Мен, сен ва у» ва «Халқ хизматкори» фильмларидир. Актёрнинг президент бўлиши янгилик эмас, ундан аввал ҳам бир неча актёрлар сайловларда ғолиб чиқишга муваффақ бўлган.

Рональд Рейган – АҚШ

АҚШнинг 40-президенти Рональд Рейган ўз фаолияти давомида 54 та бадиий фильмда суратга тушган. Норозилик, машҳурликка эришиш ва бошқа мақсадлар туфайли у сиёсатга қадам қўйган. Унинг қарорига актёрлар гилдияси касаба уюшмасига аъзолиги ҳам таъсир кўрсатади. У ерда Рональд ўзини президент сифатида кўриб, низоларни ҳал этган. General Electric Theatre телевизион дастурида 8 йил давомида бошловчилик қилган. У фаолияти давомида корпорация фабрикалари жойлашган 38 штат бўйлаб саёҳат қилиш билан бирга, фабрика ишчилари ва хизматчилари олдида доимий чиқишлар қилган. Бундай нутқлар вақтида Рейган ўзини омма олдида синаб кўриш имкониятидан самарали фойдаланган. Уч маротаба уринишдан сўнг у 1980 йилда муваффақиятга эришган ва Оқ уйниг бошқарувчисига айланган. У президент бўлганидан сўнг солиқларни камайтиришга қаратилган сиёсат юритишни йўлга қўйган.

Вацлав Гавел – Чехия

Чехословакиянинг сўнгги президенти ва Чехиянинг биринчи президенти Вацлав Гавел ёзувчи ва драматург «Люцернфильм» кинокомпанияси асосчисининг авлоди. Вацлавнинг нафақат бобоси, балки амакиси ҳам кинематография йўналишида оилавий бизнесни ривожлантирган. 1960—1968 йилларда «На Забрадли» театрида ишлаган. У дастлаб саҳна ишчиси, режиссёр ёрдамчиси ва адабий эмакдош бўлиб, кинолар суратга ола бошлаган. 1965 йилдан 2011 йилгача фильмларда рол ўйнаган. У 1965 йилдан сиёсат билан шуғулланиб, «Тварж» («Юз») адабий ва бадиий журнал таҳрирининг аъзоси бўлган. 1989 йилда инқилобдан кейин Чехословакия президенти этиб сайланган. 1990 йил 5 июлдаги сайловларда икки йиллик муддатга қайта сайланган.

Лех Качинский – Польша

Лех 13 ёшида эгизак акаси Ярослав билан биргаликда машҳур «Ойни ўғирлаганлар ҳақида» эртак-фильмида асосий ролларни ижро этган. Аммо кейинчалик актёрлик фаолиятини давом эттирмаган. Варшава универстетини тамомлаганидан сўнг Лех сиёсий карьерасини шакллантирган. Кейинчалик Сейм ва сенат аъзоси, Адлия вазири ва Варшава мэри бўлган. 2005 йилда у Польшада бўлиб ўтган президентлик сайловларида ғолиб бўлиб, полшаликларга «ахлоқий янгиланиш» ва «христиан қадриятлари»га қайтишни таклиф қилди.

Жозеф Эстрада – Филиппин

Хосе Марсело Эхерсито 20 ёшида актёр бўлган ва исмини Жозеф Эстрада деб ўзгартирган. 1956 йилда бошланган карьераси давомида у юздан ортиқ фильмларда рол ижро этган. Эстрада Филиппиннинг беш карра «Энг яхши актёри» мукофотига сазовор бўлган. 1967 йилда сиёсий ишларга ўтган ва Сан-Хуан муниципалитетининг мери бўлган. Ушбу лавозимда 16 йил ишлаганидан сўнг сенатор, 1992 йилда вице-президент, 1998 йилда эса президентлик сайловларида ғолиб бўлган. У давлат раҳбари лавозимини 2001 йилгача эгаллаб келган. Кейинчалик давлат раҳбари қимор бизнесига ҳомийлик қилгани, тамаки солиғидан ноқонуний пул олгани ва мансаб ваколатини суиистеъмол қилгани ҳамда 8,7 миллион доллар пора олганликда айбланган. Суд жараёнидан кейин президент умрбод қамоқ жазосига ҳукм қилинган. Аммо орадан кўп ўтмай янги давлат раҳбари томонидан авф этилган. Эстрада яна сиёсий фаолиятини давом эттириб, 2013 йилда Манила мери этиб сайланган.

Жимми Моралес – Гватемала

Гватемаланинг президенти Жимми Моралес олий маълумотли бўлганидан сўнг акаси билан биргаликда кино саноатида фаолият бошлашга қарор қилган. 15 йил давомида улар Моралежас телевизон дастурида Нито ва Нетони ижро этган. 2015 йилда сайловолди ташвиқоти вақтида у Гватемала халқига коррупцияга қарши курашишни ва ҳар бир талабани смартфон билан таъминлашни ваъда қилган. Шу тариқа комик актёр коррупция можароси фонида сайловда ғалаба қозонган.

Дональд Трамп – АҚШнинг собиқ президенти

АҚШнинг собиқ президенти Дональд Трамп ҳеч қачон профессионал актёр бўлмаган, аммо тез-тез фильм ва телесериалларда эпизодик ролларни ижро этган. «Арвоҳлар бундай қилмайди», «Уйда ёлғиз-2», «Вақт саёҳати», «Эдди», «Компанён», «Студия 54», «Ноқулай сайёра» ва бошқа бир қанча фильмларда кўриниш берган. 1988 йилдан буён Трамп ҳар бир сайловда АҚШ президентлигига номзодлигини қўйган. 2016 йилги президентлик сайловларида ғолиб чиққан. У 69 ёшида иш бошлаган Роналд Рейганнинг рекордини янгилаб, АҚШнинг биринчи сайланган энг кекса президентига айланган.