Музламалар сабабли Тахтақорача довонида автотранспорт воситаларининг ҳаракати 27 декабрь куни вақтинча тўхтатилди, дея хабар бермоқда Ўзбекистон ИИВ Йўл ҳаракати хавфсизлиги бош бошқармаси.
«Самарқанд ва Қашқадарё вилоятларини боғловчи Тахтақорача довонида қор ёғиб, йўлнинг қатнов қисмида музламалар ҳосил бўлганлиги, шунингдек, қор кўчиши, йўлда кўриш масофаси чекланиши, қуюқ туман тушиши эҳтимоли бўлганлиги сабабли довон орқали транспорт воситаларининг ҳаракати вақтинча тўхтатилди», — дейилади бош бошқарма ахборотида.
Идора, шунингдек, бутун мамлакат бўйлаб қор ёғгани муносабати билан, барча ҳайдовчилардан заруратсиз тунги вақтда машина ҳайдамасликни, мабодо зарурат бўлиб, кўчага чиққанда, машинани оралиқ масофани сақлаган ҳолда ҳайдашни, газ ва тормоз тепкиларини кескин босмасликни сўраган. Пиёдалардан эса эҳтиёткор бўлиш тавсия қилинган.
Изоҳ (0)