LG Rollable «рулон-смартфони»нинг нархи ошкор бўлди

Интернетда LG компанияси томонидан яратилган ноодатий экранга эга ноёб смартфонга оид қўшимча маълумотлар пайдо бўлди, деб ёзади Hi-Tech.Mail.ru.

Тарқалган маълумотларга кўра, янги моделга 7,4 дюймгача узайтириш мумкин бўлган 6,8 дюймли дисплей ўрнатилади. Шунингдек, смартфон учта режимга эга бўлиши айтилмоқда. Йиғилган ҳолатда томонлар нисбати 20:9 бўлиб, унда пикселлар сони 2428х1080 ни ташкил этади, фаол фойдаланиш ҳолатида эса томонлар нисбати 3:2 бўлиб, пикселлари — 2428х1600. Видео томоша қилиш режимида 16:9 форматда пикселлар нисбати 2428х1366 бўлади.

Смартфонга «чексиз» ишчанликка эга Snapdragon 888 чипини ўрнатиш таклиф қилинмоқда. У Qualcomm’нинг 5 нанометрли техпроцессор базасидаги биринчи процессорига айланади. Шунингдек, LG Rollable 16 гигабайт тезкор хотира ва 4200 мА/соатлик аккумуляторга эга бўлади.

Тарқалган маълумотларда қайд этилишича, янги модель 2021 йилнинг март ойида тақдим этилади. Бироқ белгиланган сана ўзгариб қолиши мумкин.

Манбаларнинг таъкидлашича, LG Rollable 2359 доллар қийматида сотувга чиқади.

Эслатиб ўтамиз, LG’да ҳозирги кунда дисплейни труба шаклида ўраш имконини берадиган технология мавжуд. Фақат ундан смартфонларда эмас, балки телевизорларда фойдаланилмоқда — LG Signature OLED ТV 88 минг доллар нархида сотувга чиққан.