Интернетда дунёдаги энг қиммат ҳимоя ниқобининг суратлари пайдо бўлди, деб ёзади Forbes.

Гап 250 грамм 18 қиротли олтиндан ясалган ва умумий оғирлиги 210 қирот бўлган 3608 дона табиий қора ҳамда оқ бриллиантлар билан безатилган аксессуар ҳақида кетмоқда. Унинг нархи 1,5 миллион доллар туради.

Ниқоб Лос-Анжелесдаги хитойлик бизнесменнинг буюртмасига асосан Исроилнинг Yvel заргарлик компанияси томонидан ясалган. Эркак ўзининг кимлигини ошкор этишни истамаган, бироқ у коллекционер эканлиги маълум. Бундан ташқари, унинг талабларидан яна бири ниқоб юқори даражадаги ҳимояга эга бўлиши ва зарарли зарраларни ўтказмаслиги керак.

Компания ҳаммуассиси Исаак Левининг маълум қилишича, буюртмачи — унинг узоқ йиллик мижози. Унинг сўзларига кўра, бизнесмен «кўплаб шов-шувни юзага келтирадиган» буюртмани амалга оширишни истаган, шу сабабли Леви бунинг учун 25 та энг яхши уста ва олмос йўнувчиларни ишга ёллаган. Дунёдаги энг қиммат ҳимоя ниқоби устида ишлар уч ой давом этган.

Аввалроқ ҳиндистонлик эркак коронавирусдан ҳимояланиш учун ўзига 4 минг долларга тилла ниқоб ясаттиргани тўғрисида хабар берилганди.