«Ўзгидромет» синоптиклари октябрь ойида кузатилган об-ҳаво таҳлили ва кузнинг сўнгги ойида кутилаётган об-ҳаво прогнозини эълон қилди.
Деярли бутун октябрь давомида Ўзбекистон ҳудудида об-ҳаво асосан қуруқ ва шамолсиз бўлди. Фақат айрим кунлардагина Фарғона водийси вилоятларида ва тоғли туманларда ёмғир ёғди. Баланд тоғли ҳудудларда қор ҳам ёғиб, бу йилги биринчи қор қоплами ҳосил бўлди, лекин у беқарор бўлиб, икки-уч кунда эриб кетди.
«Қуруқ октябрлар бизда тез-тез кузатилади, бироқ бу йилги октябрь экстремал қуруқ бўлди, мамлакатда бутун метеорологик кузатувлар даврида энг ёғингарчиликсиз октябрлардан бири бўлгани қайд этилди», — дейилади синоптиклар таҳлилида.
Ноябрь — кузнинг охирги ойи ва у одатда ҳароратнинг кескин ўзгаришлари билан ажралиб туради. Ноябрь ойининг ўртача ҳарорати октябрга нисбатан 5-7 даража пастдир. Бу ойда ёғингарчилик ҳам кўпроқ кузатилади, кўпроқ давом этиб, кучлироқ бўлади. Ноябрда ёмғирнинг қорга айланиш ҳолатлари такрорланиб туради. Тоғли туманларда айрим жойларда қор қоплами ҳосил бўлса-да, кўпинча у беқарор бўлади.
Қайд этилишича, бутун кузатувлар тарихидаги энг иссиқ йилларда ноябрь ойида ҳарорат одатда ойнинг биринчи ярмида 27-32 даражагача, жанубда 34 даражагача кўтарилган. Ўтган асрнинг ўртасигача энг совуқ ноябрларда ҳарорат 13-18 даража совуққача, ҳатто ундан ҳам паст, шимолда 22-27 даража совуққача пасайган.
Лекин сўнгги 50 йил ичида республика ҳудудида ноябрда бундай совуқлар кузатилмаяпти. Камдан кам ҳолатларда тунда ҳарорат 4-6 даража совуққа, шимолда 13-16 даража совуққача тушади. Фақат 2016 йил ноябрининг охирги ўн кунлигида ҳарорат 8-13 даража совуқ, шимолда 20-22 даража совуқ бўлган.
«Ўзгидромет»нинг жаҳон об-ҳаво марказлари маълумотларидан фойдаланиб тайёрлаган дастлабки баҳоларига кўра, бу йилги ноябрь ҳам ҳарорат режими, ҳам ёғингарчилик режими бўйича меъёрларга яқин бўлиши кутилмоқда.
Ноябрнинг деярли бутун биринчи ҳафтаси давомида Ўзбекистонда об-ҳаво кам булутли бўлади. Дам олиш кунларида булутлилик ортади, бироқ қуруқ ҳаво кейинги ҳафтанинг бошигача сақланиб туради. Ҳарорат кечаси 2-7 даража, кундузи 18-23 даража бўлади.
Изоҳ (0)