«Ўзбекистоннинг бир нечта ҳудудларида қуёш, шамол ва иссиқлик электр станциялари қурилади» – Энергетика вазири ўринбосари

Жиззах, Самарқанд ва Сурхондарёда қуёш, Бухоро ва Қорақалпоғистонда шамол, Сирдарё ва Сурхондарёда иссиқлик электр станциялари барпо этилади. Бу ҳақда 27 октябрь куни Энергетика вазири ўринбосари Шерзод Ходжаев АОКАда бўлиб ўтган брифинг маълум қилди.

«Энергетика соҳасига хусусий инвестициялар кириб келиши бошланди. Бир йилнинг ўзида давлат-хусусий шериклик асосида 2 миллиард долларлик тўғридан-тўғри сармояларни жалб қилиш, 2 минг 700 мегаватт қувватли 6 та янги электр станциясини қуриш бўйича лойиҳалар ишлаб чиқилди. Қолган станцияларни модернизация қилинади, энергия тежамкорликни ошириш, таннархни пасайтириш ва истиқболда электр энергиясининг рақобатли бозори яратилади», – деди Шерзод Ходжаев.

Брифингда маълум қилинишича, бугунги кунда электр станцияларининг эскирганлик даражаси 50 фоиздан юқори ёки эски қувватларда ёқилғи сарфи янги буғ-газ қурилмаларига нисбатан 2 бараварга ортиқ. Модернизация ишлари энди давлат кафолати ҳисобига эмас, балки хусусий капитални жалб қилиш орқали амалга оширилади.

Шунингдек, «Ўзбекистон миллий электр тармоқлари», «Ҳудудий электр тармоқлари», «Иссиқлик электр станциялари» ҳамда «Ўзбекгидроэнерго» акциядорлик жамиятларида молиявий ҳисоботларни жаҳон стандартлари асосида тайёрлаш тизимига ўтади. Мазкур 4 компаниянинг уч йиллик молиявий модели ва бизнес режалари ишлаб чиқилади. Трансформация жараёнларига кўмаклашиш учун корхоналар бошқарувига ва кузатув кенгашларига чет эллик мутахассислар жалб қилинади.

Бундан ташқари электр энергияси улгуржи бозори қоидалари белгиланмагани сабабли инвесторлар билан энергияни қатъий нархларда харид қилиш бўйича узоқ муддатли шартномалар имзоланмоқда. Бундай ёндашув келгусида рақобатнинг чекланишига олиб келиши мумкин. Шу боис электр энергияси рақобатли бозорига ўтиш босқичлари ва қоидаларини белгиловчи ҳужжат ишлаб чиқилади ва соҳага илғор технологияларни кенг жорий этилади, «рақамли трансформация» амалга оширилади.