Фарғонада прокуратура идоралари томонидан вилоят ҳудудидаги деҳқон бозорларида нарх-наво барқарорлигини таъминлаш мақсадида ўтказилган назорат тадбирларида озиқ-овқат, қишлоқ хўжалик маҳсулотларини асоссиз ва қиммат нархда сотган 129 нафар шахс маъмурий жавобгарликка тортилган. Бу ҳақда халқ депутатлари вилоят кенгашининг ўн тўққизинчи сессиясида вилоят прокурори Улуғбек Қосимов маълум қилди, деб хабар берди «Дарё» мухбири Азизжон Эрматов.
Вилоят прокурорининг қайд этишича, ҳудудларда даврий равишда янгиланиб турадиган озиқ-овқат ҳамда қишлоқ хўжалик маҳсулотлари захирасини яратишга етарли эътибор қаратилмаганлиги бозорлардаги нарх-навонинг ошиб кетишига олиб келмоқда.
Бу ҳолатлар 16—18 октябрь кунлари вилоят прокуратураси ҳамда департамент идоралари томонидан ўтказилган мониторинг натижаларида ҳам ўз исботини топган.
Назорат тадбирида 11 минг 240 та растаси бўлган 24 та бозорнинг 17 тасида омборхонаси мавжуд бўлса-да, ҳозирда куз-қиш мавсуми учун озиқ-овқат маҳсулотлари захираси мавжуд эмаслиги аниқланган.
Ушбу ҳолатлар юзасидан бозор маъмуриятининг 30 нафар мансабдорига ҳамда озиқ-овқат маҳсулотларини қиммат нархда сотган 475 нафар шахсга нисбатан расмий огоҳлантирув эълон қилинган. Шунингдек, 129 нафар шахс маъмурий жавобгарликка, бу борада етарли назоратни таъминламаган 2 нафар департамент ходими интизомий жавобгарликка тортилган.
Маълум қилинишича, Бешариқ туманидаги деҳқон бозори ҳудудида фуқаро Б.Х. белгиланган тартибда давлат рўйхатидан ўтмасдан, 30 килограмм мол гўштини қиммат нархда, яъни 62 минг сўмдан сотаётганлиги аниқланиб, унга нисбатан маъмурий ҳуқуқбузарлик ҳужжатлари расмийлаштирилган.
«Шунинг учун ҳам бугунги кундаги энг муҳим вазифамиз – халқимиз учун арзон ва сифатли озиқ-овқат маҳсулотларини етказиб бериш, бу орқали одамларнинг кайфиятини кўтариш ва эртанги кунга бўлган ишончини орттириш ҳисобланади», — дея таъкидлаган вилоят прокурори У.Қосимов.
Эслатиб ўтамиз, аввалроқ Фарғонадаги бозорларда гўштни 62 минг, шакарни 7500 сўмдан сотган фуқароларга чора кўрилган хабар берилганди. Шавкат Мирзиёев раислигида 16 октябрь куни озиқ-овқат хавфсизлигини таъминлаш ва ички бозорда нарх-наво барқарорлигини сақлаш чора-тадбирлари юзасидан видеоселектор йиғилиши ўтказилди. Унда гўшт, тухум, ўсимлик ёғи ва шакар нархининг кескин ўсиши аҳолининг норозилигига сабаб бўлаётгани таъкидланди. Президент барча озиқ-овқат маҳсулотларининг захираси бўлиши кераклигини, бу давлат сиёсатига айланиши лозимлигини таъкидлади.
Мавзуга доир: Тошкентда гўшт нархига чеклов ўрнатилди
Изоҳ (0)