Футбол бўйича Англия Премьер Лигасининг 4-турида «Манчестер Юнайтед» 4 октябрь, якшанба куни «Тоттенҳэм»ни қабул қилди.
Учрашувнинг илк дақиқасидаёқ мезбонлар пенальти ишлаб олди, уни Бруну Фернандеш голга айлантирган ҳолда ҳисобни очди. Бироқ Лондон клуби бунга тезда иккита гол билан жавоб қайтарди: 4-дақиқада Танги Ндомбеле ҳисобни тенглаштирган бўлса, орадан уч дақиқа ўтиб Сон Ҳён Мин Ҳарри Кейннинг узатмасидан унумли фойдаланди.
Бунинг устига 28-дақиқада майдон эгалари бир ўйинчи кам бўлиб қолди: Антони Марсьяль рақиб футболчисининг юзига зарба бергани учун қизил карточкага лойиқ кўрилди.
Четлатишдан кейин тўлиқ устунлик Жозе Моуриньо шогирдлари томонига ўтди. Танаффусга қадар меҳмонлар Харри Кейн ва Соннинг голлари эвазига ҳисобни йирик кўринишга олиб келди.
Иккинчи бўлимда «Тоттенҳэм» яна икки бор «қизил иблислар» дарвозасини ишғол қилди. 51-дақиқада Серж Орье жамоасининг тўртинчи голини урган бўлса, ўйин якунланиши арафасида Ҳарри Кейн пенальтини аниқ бажариб якуний ҳисобни ўрнатди.
Ушбу ғалабадан кейин «Тоттенҳэм»нинг очколари 7 тага етди ва жамоа 5-ўринга кўтарилди. «Манчестер Юнайтед» эса 3 очко билан 16-поғонага тушиб кетди.
АПЛ
4-тур баҳси
4 октябрь, якшанба
«Манчестер Юнайтед» — «Тоттенҳэм» 1:6
Голлар: 1:0 – 2, пенальти Бруну Фернандеш, 1:1 – 4 Ндомбеле, 1:2 – 7 Сон Ҳён Мин, 1:3 – 30 Кейн, 1:4 – 37 Сон Ҳён Мин, 1:5 – 51 Орье, 1:6 – 79, пенальти Кейн.«Манчестер Юнайтед»: Де Хеа, Байи, Шоу, Магуайр, Уан-Биссака, Матич (Мактоминай, 46), Бруну Фернандеш (Фред, 46), Погба, Марсьяль, Рэшфорд, Гринвуд (ван де Бек, 68).
«Тоттенҳэм»: Льорис, Регилон, Санчес, Орье, Дайер, Ҳейберг, Сиссоко, Ламела (Лукас Моура, 46), Ндомбеле (Алли, 69), Сон Ҳён Мин (Дэвис, 73), Кейн.
Огоҳлантиришлар: Ламела (32), Байи (63), Шоу (84).
Четлатиш: Марсьяль (28).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)