«Тошиссиққуввати»: Октябрда ҳарорат пасайса, аҳолига иссиқлик етказиб бериш барвақт бошланиши мумкин

Бу ҳақда 30 сентябрь куни Уй-жой коммунал хизмат кўрсатиш вазирлиги ва «Ўзбеккўмир» АЖ мутасаддилари иштирокида «Ижтимоий соҳа объектларини 2020—2021 йиллар куз—қиш мавсумига тайёрлаш» мавзусидаги матбуот анжуманида маълум қилинди.

Бу йил куз—қиш мавсумига тайёргарлик ишлари республикада коронавирус пандемияси тарқалиши натижасида ҳудудларда эълон қилинган карантин шароитида амалга оширилмоқда, бу эса ушбу ишларга бошқача тарзда ёндашишни, янги тизим жорий этишни талаб этади.

Бу борада олдинги йилларда йўл қўйилган камчиликлардан тўғри хулоса чиқарган ҳолда, ишлар ташкил этилмоқда. Бугунги кунда республикамиз бўйича марказлашган иссиқлик таъминоти тизими билан 14,7 мингдан зиёд кўп хонадонли уйлар қамраб олинган.

Аҳолига иссиқлик таъминотини етказиб бериш ташкилотлари тасарруфида жами 633 та марказий ва локал қозонхоналар ва 2 830 км иссиқлик тармоқлари мавжуд. Иссиқликни етарли даражада ва сифатли тарзда етказиб бериш учун тижорат банклари томонидан 2020 йил 30 сентябрь ҳолатига 30 863,0 млн сўмдан ортиқ кредит маблағлари ажратилди.

Шунга кўра, республикада фаолият юритаётган 4 430 та ширкат 3 тоифага ажратилди. Жумладан, хатловга кўра 1 351 таси яхши, 1 986 таси ўрта ва 1 093 таси оғир тоифада фаолият юритаётгани аниқланди. Оғир тоифада бўлган 1 093 та ширкатлар фаолияти бўйича аҳоли фикр-мулоҳазаларини инобатга олган ҳолда, тугатиш чораларини кўриб, улар ўрнига бошқарув ташкилотлари ташкил этилиб, кўп квартирали уйлар бошқарувини уларга бериш кўзда тутилган.

Шунингдек, куз—қиш мавсумида бир қанча ижтимоий соҳа объектлари:

• 762 та Мактабгача таълим муассасалари;
• Халқ таълими вазирлиги тизимидаги 130 та умумтаълим мактаби ва 40 та болалар уйлари ва махсус мактаб-интернатлар;
• Соғлиқни сақлаш вазирлиги тизимидаги 67 та даволаш-профилактика муссасалари;
• 179 та касалхона ва поликлиникалар;
• 7 та «Мурувват» пансионатлари ва «Саховат» реабилитация марказлари

жорий ва мукаммал таъмирланди.

Азиз Каримбеков, «Тошиссиққуввати» ДУК бош муҳандиси