Тошкент вилоятининг Бўстонлиқ туманида «Билдирсой-Чимён-Нанай» халқаро умуммавсумий курортини ташкил қилиш бўйича мастер-режа ишлаб чиқилди (Ҳукуматнинг 2020 йил 17 сентябрдаги 559-сон қарори). Бу ҳақда «Норма» хабар берган.
Хабарга кўра, режа Франциянинг Хусусий секторга кўмак ва тадқиқот фонди (ФАСЕП) ёрдами билан Геоде, Маниэ Ливес, Эгис, Патриарче, Эподе француз компанияларининг консорсиуми томонидан ишлаб чиқилган. Мастер-режада 500 миллион АҚШ долларигача бўлган инвестицияларни, шу жумладан, Франция ҳукумати молия институтларининг маблағларини жалб қилиш назарда тутилган. Улар туризм, йўл-транспорт ва коммунал инфратузилмани ривожлантиришга йўналтирилади.
Шунингдек, Инвестициялар ва ташқи савдо вазирлиги Консорсиум билан маслаҳат хизматлари битимини тузди. Унда ХУКни ташкил қилиш доирасида қуйидагилар назарда тутилган:
- лойиҳаларни техник назорат қилиш;
- осма дор йўллари, чанғи трассалари, аттракционларни батафсил режалаштириш ва жойлаштириш;
- ер участкаларини лотларга бўлиш, шу жумладан, тендер ҳужжатларини ва туризм инфратузилмаси объектларини – меҳмонхоналар, ресторанлар, савдо шохобчалари ва бошқаларни қуриш учун махсус режим қоидаларини тайёрлаш.
Халқаро умуммавсумий курортни қуриш ва эксплуатация қилиш бўйича лойиҳа офиси («Чорвоқ» эркин туристик зонаси иштирокчиси мақомига эга бўлган давлат унитар корхонаси) ташкил этилади. Халқаро умуммавсумий курортни қуриш ва фойдаланишга топшириш лойиҳасини жадал амалга ошириш бўйича Бошқарув кенгаши умумий мувофиқлаштирувчи ролини бажаради.
Молиялаштириш манбалари этиб қуйидагилар белгиланган:
- Халқаро умуммавсумий курортни қуриш ва қурилиш ишлари билан боғлиқ хизматлар учун ускуналарни (осма дор йўллари, тоғ-чанғи ускуналари, аттракционлар, техникалар, транспорт воситалари) сотиб олиш – Ўзбекистон ТИФ Миллий банки кредитлари (15 фоиз) ва Франция ғазначилигининг заёмлари (85 фоиз);
- Консорсиум билан тузилган маслаҳат хизматлари битимини молиялаштириш – Давлат бюджети маблағлари, кейинчалик лойиҳа офиси фаолиятидан тушган даромадлар ҳисобига қайтарилади (15 фоиз) ва Франция Ғазначилигининг заёмлари (85 фоиз).
а) Франция Ғазначилиги ХУК қурилиши бўйича лойиҳани амалга ошириш учун Ўзбекистонга заём – 47,9 миллион евро ажратади. Лойиҳанинг ТИА экспертизадан ўтказилганидан ва маъқулланганидан кейин қарз битими имзоланади;
б) Ўзбекистон ТИФ Миллий банки халқаро умуммавсумий курортнинг йўл-транспорт, коммунал ва туризм инфратузилмаларини қуриш учун лойиҳа офисига кредит – 2 йиллик имтиёзли давр, йиллик 3 фоиз LIBOR+6 ойга тенг бўлган фоиз ставкаси билан 7 йил муддатга 20 миллион доллар беради. Инфратузилмани қуриш харажатлари лойиҳанинг ТИА асосида молиялаштирилади;
в) Франция Ғазначилигининг қарз маблағлари, шунингдек, Ўзбекистон ТИФ Миллий банкининг кредити бўйича асосий қарзлар, фоизлар, воситачилик ҳақи ва заёмга хизмат кўрсатиш бўйича бошқа харажатлар республика бюджети маблағлари ҳисобига қопланади. Келгусида лойиҳа офиси маблағларни бюджетга қайтаради.
Халқаро умуммавсумий курорт ҳудудида жойлашган ер участкаларига бўлган ҳуқуқлар Бошқарув кенгашининг қарорлари билан Э-ижро Аукцион орқали босқичма-босқич сотилади. Истисно тариқасида, уларни сотишдан тушган маблағлар қуйидагиларга йўналтирилади: 90 фоизи – лойиҳа офиси ҳисобига, 10 фоизи – Тоғли ва олис ҳудудларда туризм инфратузилмасини ривожлантириш жамғармасига.
Қонун ҳужжатлари маълумотлари миллий базасида эълон қилинган ва 2020 йил 18 сентябрдан кучга кирган.
Изоҳ (0)