Канадада коронавирус эпидемиясининг иккинчи тўлқини бошланди ва изоляция борасидаги тавсияларга амал қилинмаса, вазият ёмонлашиши мумкин. Бу ҳақда мамлакат бош вазири Жастин Трюдога таяниб, Reuters хабар берди.
Маълумотларга кўра, иккинчи тўлқин Канаданинг тўртта йирик провинциясида бошланган.
«Биз баҳордагидан ҳам ёмонроқ бўлиши мумкин бўлган қулаш ёқасида турибмиз. Иккинчи тўлқинни назорат остига олиш имкониятимиз бор. Буни амалга ошира олишимизни биламан», — дейди бош вазир.
Трюдонинг таъкидлашича, коронавирус сабабли мамлакатда 13 март куни локдаун эълон қилинганда кунига 47 та янги касалланиш қайд қилинган бўлса, 22 сентябрнинг ўзида бундай ҳолатлар мингдан кўпроқни ташкил қилган.
Бош вазирнинг сўзларига кўра, ушбу вазиятни ўзгартириш мумкин, бироқ бунинг учун Канаданинг барча аҳолиси ниқоблар тақиши, ижтимоий масофага риоя қилиши ва гриппдан эмланиши зарур. Шунингдек, у Канадада октябрда нишонланадиган Шукроналик кунини катта кўламда ўтказишнинг иложи бўлмаслиги, бироқ Рождествода бунинг имкони бўлиши мумкинлигини таъкидлаган.
Канада ҳукуматининг маълумотларга кўра, мамлакат коронавирус билан касалланганлар сони 147 753 кишига етган.
Аввалроқ Туркия ва Украинада ҳам коронавирусга чалиниш ҳолатлари ортгани сабаб карантин чекловлари яна кучайтирилгани тўғрисида хабар берилганди. Арманистонда эса карантин чоралари 11 январга қадар узайтирилган. Чехия ва Австрияда ҳам коронавируснинг иккинчи тўлқини бошланган.
Изоҳ (0)