Қўшиқлари хит бўлган ҳинд фильми — «Диско раққоси» актёрлари 38 йилдан сўнг (фото)

«I am а Dissco Danser» ва «Jimmy, Jimmy, Jimmy, Aaja» қўшиқлари хит бўлишига сабабчи бўлган «Диско раққоси» фильми премьераси 1982 йилда бўлиб ўтган. Мухлислар қалбидан жой олган мазкур фильмда ижроси билан эсда қолган актёр ва актрисалар ҳақида маълумот бериб ўтамиз.

Митхун Чакраборти — Анил (Жимми)

Митхун болалигидан актёр бўлишни истаган, аммо кинога қадам қўйишнинг ўзи бўлмаган айниқса, ночор оила фарзандига. Мактабни тамомлагач, коллежда кимё бўйича таълим олган Чакраборти, митингда иштирок этгани сабаб қамоққа олинишига бир бахя қолган. Отаси уни қариндошлари яшайдиган бошқа шаҳарга юборганидан кейин у жазодан қутулиб қолган. Аввалига косметик воситаларни сотиш билан шуғулланган кейинроқ эса Кино институтида янги курс очилгани ҳақида эшитгач, ҳужжатларини ўқишга топширган. Олийгоҳни аъло баҳога битирганидан кейин асосан эпизодик ролларга таклиф қилинган.

1976 йилда «Қироллик ови» фильмида суратга тушган ва ижроси сабаб «Энг яхши эркак ижрочи» деб топилган. 70 йиллар охирида диско услубидаги мусиқа урфда бўлган ва режиссёрлар шунга мос равишда кино яратишни истаган. «Диско раққоси» ижодкорларига ҳам эндигина карьерасини бошлаган ва истеъдодли актёр керак бўлган. Митхун эса мазкур фильмда ўзини ўйнагандек бўлган — камбағал оиладан чиққан, аммо машҳур бўлишни истайдиган истеъдодли Анил ролини гавдалантирган. Фильм премьерасидан кейин Митхун нафақат Ҳиндистон, балки бошқа мамлакатларда ҳам машҳурликка эришган. У карьераси давомида 350 дан ортиқ кинолентада роль ўйнаган. Ижросидаги «Душман», «Жунгли қонунияти бўйича», «Ўйна, ўйна» фильмлари ҳам машҳур. Унинг исми ҳинд тилидаги кўплаб фильмларда суратга тушган актёр сифатида Гиннеснинг рекордлари китобидан ўрин олган. У бугунги кунда ҳам суратга тушишда давом этмоқда.

Ёшлигида манекенчи Хелена Лок билан қурган турмуши узоққа бормаган актёр, кейинроқ актриса Ёгита Балига уйланади. Рафиқаси оиласини санъатдан устун қўяди ва тўрт фарзанди тарбияси билан машғул бўлади.

Каран Раздан — Сем Оберой

Фильмда Сем ролини гавдалантирган актёр, асосан 80 йилларда суратга тушган кейинчалик эса режиссёр ва сенарий муаллифи сифатида фаолият олиб борган. Унинг ҳаёти деярли номаълум. Раздан актриса Прия Тендулкар билан турмуш қурган, лекин қилган хиёнати сабаб 1995 йилда ажрашган.

Ом Пури — Дэвид Браун

Университетни тамомлаганида кейин суратга тушишни бошлаган актёр ҳам аввалига бошқалар сингари иккинчи даражали ролларни ижро қилган. 1980 йилда эса «Ярадорнинг фарёди» фильмидаги ижроси учун «Энг яхши иккинчи даражали актёр» деб топилган. Кейинги муваффақиятли лойиҳа «Диско раққоси» бўлган. Пури карьераси давомида 250 га яқин фильмда суратга тушган. Улар орасида Британия ва америкалик режиссёрлар фильми ҳам йўқ эмас. У икки марта оила қурган. Биринчи рафиқаси режиссёр Сима Капур билан турмуши ўхшамаганидан кейин у билан ажрашиб, кейиноқ Нандини Пурига уйланган ва ўғил фарзандли бўлган. Ижоддан тўхтамаган актёр, 2007 йилда юрак хуружидан вафот этган.

Калпана Аер — Никки Браун

Калпана нафақат 80-90 йилларнинг машҳур актрисаси, балки «Ҳиндистон гўзали» номига сазовор бўлган модель сифатида ҳам яхши маълум. Унда муваффақиятли карьера учун гўзаллик ва истеъдод бўлишига қарамай, актриса сифатида фаолиятини давом эттирмаган. Бугунги кунда у Дубайда ресторатор сифатида ишлайди.

Ким Яшпал — Рита Оберой

Модель сифатида карьерасини бошлаган Кимнинг, киносаноатга қадам қўйишига режиссёр Дэнни Дензонгпа сабабчи бўлган. Айнан у сабаб «Диско раққоси» фильмида роль ижро қилишга муваффақ бўлган актриса, 10 йиллар давомида суратга тушишдан тўхтамаган. Аммо 90 йиллар ўрталарида актрисалик фаолиятини тугатган.

Гита Сиддхарт — Радха, Анилнинг онаси

Фильмда Анилнинг онаси ролини гавдалантиргани актриса карьерасидаги энг эсда қоларли роллардан бири бўлган. Бундан ташқари «Ўйна, ўйна», «Қасос ва қонун» фильмларида ҳам суратга тушган Гита, Ҳиндистонда асосан театр актрисаси сифатида таниқли ҳисобланади. Сиддхарт Как билан турмуш қурган актриса 2019 йилда вафот этган.

Ражеш Кҳанна — Ражунинг амакиси

Ражеш нафақат 180 га яқин фильмда суратга тушган актёр, балки продюсер ва сиёсатчи сифатида ҳам яхши маълум. 1973 йилда «Бобби» фильмидаги актриса Димпл Кападдия билан турмуш қурган Кҳанна икки фарзанднинг отаси бўлган, бироқ 11 йилдан кейин муносабатларига якун ясаган. Актёр 2012 йилда вафот этган.