Миржалол Қосимов: Иккинчи бўлимда «Бунёдкор»нинг хатоларидан унумли фойдаландик

ОКМК бош мураббийи Миржалол Қосимов Coca-Cola Суперлига 16-тури доирасида «Бунёдкор»га қарши кечган ўйиндаги ғалабадан (3:2) кейин ўз фикрлари билан ўртоқлашди.

Ўйин ҳар иккала жамоа учун жуда муҳим эди. Охирги пайтларда ушбу икки клуб ўртасида жуда ҳам қизиқарли баҳслар гувоҳига айланяпмиз. Учрашувни ёмон бошламадик, лекин биринчи бўлимнинг иккинчи қисмида ўйин тизгинини бой бериб қўйдик. Бу орқали ўз дарвозамиздан тўп олиб чиқишга мажбур бўлдик.

Иккинчи бўлимда йигитлар ўзини кўрсатди ва рақиб жамоа хатоларидан тўғри фойдаланди. Ҳар икки жамоа дарвозабонлари қандайдир ишончсиз ҳаракатланди. Ҳисоб 2:2 бўлиб турганида бир нечта қулай имкониятларга эга бўлдик, охир-оқибат Жасур Умаровнинг урган голи бизга ғалаба келтирди. Қолаверса, майдон сифати яхши ҳолатда эмас ва бу қийинчилик туғдирди. Ғалабадан хурсандмиз. Футболчилар ва мухлисларга ўз миннатдорчилигимни билдираман.

Таркибга ёшларни жалб қилиш? Албатта, кузатиб боряпмиз. Қолаверса, ўзимизни ёшлардан жалб қиламиз. Фақат, муаммо — яхши ўйинчиларни топишда. «Бавария»ни кўряпсизлар, жамоанинг ўртача ёши катта бўлса ҳам йирик ҳисобларда ютиб юрибди. Чунки уларда ўз тарихи, академияси, мактаби бор.

Миржалол Қосимов, ОКМК бош мураббийи

ОКМК мазкур ғалабадан кейин очколарини 33 тага етказиб олган ҳолда иккинчи ўринга қайтди. Жамоа кейинги турда «Қизилқум»га қарши баҳс юритади.