АОКА ҳузуридаги штабда 17 сентябрь куни Халқ таълими вазирлиги иштирокида брифинг бўлиб ўтди. Унда вазирлик ахборот хизмати раҳбари Лайло Рустамова жойларда мактаб дарсликлари борасида юзага келаётган муаммолар юзасидан изоҳ бериб ўтди.
«Ўтган ўқув йили пандемия шароитида тугатилганлиги сабабли ўқувчилардан дарсликларни тўлиқ йиғиб олиш имконияти бўлмади. Айни вақтда мактабларнинг 75 фоизида анъанавий таълим жараёни бошланмагани учун фойдаланилган дарсликлар мактабга қайтарилмаган. Шу боис ўқувчиларнинг дарсликлар билан таъминланишида муаммолар юзага келмоқда.
Бундан ташқари, карантин даврида баъзи босмахоналарда китоб чоп этиш билан боғлиқ муаммолар юзага келди. 2020 йил 1 октябргача барча мактаблар дарсликлар билан тўлиқ таъминланиши чора-тадбирлари кўрилмоқда. Дарсликлар билан тўлиқ қамраб олингунга қадар ўқувчилар электрон дарсликлардан фойдаланишлари мумкин. Дарсликлар электрон варианти Халқ таълими вазирлиги ахборот-таълим портали (eduportal.uz) ва расмий веб-сайтга (uzedu.uz) жойлаштирилган», – деди Рустамова.
https://youtu.be/IN8vb-oHbwQ?t=191
Аввалроқ Ўзбекистонда кўзи ожиз ўқувчилар учун илк бор 10 ва 11-синф дарсликлари чоп этилиши маълум қилинганди.
Изоҳ (0)