АҚШ космик агентлиги экспертлари Hubble телескопи ёрдамида Юпитерда қизил, унинг остида эса оқ пўртанани сурага олишга муваффақ бўлди. Бу ҳақда NASA’нинг Instagram’даги саҳифаси орқали маълум қилинди.

Маълум қилинишича, қизил пўртана Ерни ютиб юборишга қодир даражада кучли ҳисобланади. Шу билан бирга, иккинчи пўртана ҳам дастлаб қизил бўлган, бироқ кейинроқ оқариб у ҳам авжига чиққан, аммо биринчидан кўра бироз кучсизроқ.

Бундан ташқари, тасвирларда улкан сайёранинг табиий йўлдошларидан бири — Европани кўриш мумкин.

https://www.instagram.com/p/CFPtT_anZep/?utm_source=ig_embed

Hubble’нинг расмий сайтида ёзилишича, сурат 25 август куни олинган бўлиб, ўша вақтда сайёра Ердан 653 миллион километр узоқликда бўлган.

«Hubble’нинг ноёб ва жозибали янги суратида соатига 560 километр тезликда ҳаракатланаётган ёрқин, оқ ва энига катталашиб бораётган пўртана тасвирланган», — дейилади хабарда.

Аввалроқ Hubble телескопи «Гўшт чангаги» галактикасини суратга олишга муваффақ бўлгани тўғрисида хабар берилганди.