Маҳалла ва оилани қўллаб-қувватлаш вазири Раҳмат Маматов бошчилигидаги ишчи гуруҳ Самарқанд вилояти Пастдарғом туманидаги «Қўқони» маҳалласи раиси ўғлини камбағал қилиб кўрсатгани ва маҳалладаги камбағал оилаларга кўрсатилаётган ижтимоий ёрдам намунаси сифатида ўз уйида 1000 дона жўжа боқаётгани билан боғлиқ ҳолатни ўрганмоқда. Бу ҳақда вазирлик томонидан маълум қилинди.
«Kun.uz» нашри «Пастдарғомда ‘1000 та жўжа спектакли’: Бош ролларда прокурор ва ўғлини камбағал қилиб кўрсатган ‘маҳаллақўм’» номли мақола эълон қилган. Мақолада Самарқанд вилояти Пастдарғом тумани «Қўқони» маҳалла фуқаролар йиғини раиси Ҳусниддин Турсунов маҳалладаги камбағал оилаларга кўрсатилаётган ижтимоий ёрдам намунаси сифатида ўз уйида боқилаётган 1000 дона жўжани ҳамда камбағал оила вакили сифатида ўз ўғли Достон Тиркашевни кўрсатгани баён этилган.
Вазирлик томонидан маълум қилинишича, ҳозирда мазкур мақолада келтирилган ҳолатлар маҳалла ва оилани қўллаб-қувватлаш вазири Раҳмат Маматов бошчилигидаги ишчи гуруҳ томонидан воқеа жойига борган ҳолда атрофлича ўрганилмоқда.
Қайд этилишича, мазкур ҳолат бўйича «Қўқони» маҳалла фуқаролар йиғини вакиллари йиғилиши ўтказилган. Йиғилишда вазирлик раҳбарияти иштирок этиб, воқеа иштирокчиларининг хатти-ҳаракатлари устидан қонун доирасида зарур чоралар кўриши режалаштирилган.
Шунингдек, мақолада келтириб ўтилган ҳолатларга ҳуқуқий баҳо бериш бўйича воқеа ва унда иштирок этган масъул ходимлар билан боғлиқ тегишли ҳужжатлар ҳуқуқни муҳофаза қилувчи органларга тақдим этилади.
Изоҳ (0)