Беларусда нима гап? 29 августнинг асосий хабарлари

Беларусда 9 августдан буён давом этаётган норозилик намойишлари бугун ҳам давом этди. Қуйида бугуннинг асосий воқеаларини эсга оламиз.

Дастлаб гуруҳ мотоциклчилар бирдамлик мотоюришини амалга оширди.

Беларусь ҳукумати олдинги кунларда ҳибсга олинган бир қатор хорижий журналистлар ва ОАВнинг аккредитациясини бекор қилишга қарор қилди.

Улар орасида AFP, BBC, RFE/RL каби нашрларнинг журналистлари ҳам бор. Бу қарор қатор хорижий дипломатлардан тортиб, мухолифат етакчиси Светлана Тихановскаянинг ҳам норозилигига сабаб бўлди.

Ҳибсга олинганлар ва мамлакатдан чиқариб юбориладиганлар орасида россиялик журналистлар ҳам бор.

АҚШ ва Европа Иттифоқи Беларусь масаласида қўшма баёнот тайёрлади. Баёнот матни ЕИ Минскдаги ваколатхонаси веб-сайтида эълон қилинди. Бу ҳақда «РИА Новости» хабар берди.

Баёнотни ЕИ, АҚШ, Буюк Британия ва Швейцария каби давлатлар имзолади. Унда Беларусь ҳукуматини намойишчиларга нисбатан куч ишлатмасликка ҳамда инсон ҳуқуқларига риоя этилишига чақирилди.

Олдинроқ Беларусь президенти Александр Лукашенко мамлакатдаги «кўча намойишлари»ни Ғарб дастаклаётганини таъкидлаган эди.

Куннинг энг кутилган воқеаси – Минскдаги «Аёллар марши». Meduza маълумотига кўра, Минск кўчаларига 10 мингдан ортиқ аёллар намойишга чиқди. Улар ҳукуматдан қайта сайлов ўтказишни, сиёсий маҳбусларнинг озод қилинишини ва намойишчиларга нисбатан куч ишлатган орган ходимларига нисбатан жиноий иш очилишини талаб қилмоқда.

Намойишчиларга ОМОН ходимлари қаршилик қилди.

Россиянинг Санкт-Петербург шаҳрида ҳам Минскдаги аёллар маршини қўллаб-қувватлаб намойишлар ташкил этилди.

Намойишга чиққан аёллар орасида мухолифатнинг етакчиларидан бири – Светлана Тихановскаянинг ишонган ёрдамчиси Мария Колесникова ҳам иштирок этди.

Шунингдек, намойишлар пайтида бир воқеаларни кузатиб бораётган бир қатор журналистлар ҳибсга олинган. Улар орасида RFE/RL журналистлари Алекс Пилецкий, Андрей Рабчик, Deutsche Welle журналисти Павлюк Биковскийлар ҳибсга олинди. Биковский кейинчалик қўйиб юборилди.

Шунингдек, намойишлар пайтида BelSat журналистлари Александр Любенчук ва Дмитрий Мицкевичлар ҳам ғойиб бўлди. Улар ҳам ҳибсга олинган бўлиши мумкин.

Минскдаги аёллар марши ҳамон давом этмоқда. Намойишчилар шаҳарнинг энг йирик кўчалари бўйлаб юрмоқда. Марказий майдонларга олиб борувчи йўллар  куч ишлатар тизим ходимлари томонидан тўсиб қўйилди. Шунингдек, метронинг бир нечта станциялари ҳам ёпилиб, кейинчалик қайтадан очиб юборилди.

Беларусда ҳукуматга қарши норозилик намойишлари давом этмоқда.