5 август куни Туркманистон президенти Гурбангули Бердимуҳамедов ўзининг янги китобини ёзиб тугатди. Бу ҳақда «Туркменистан Сегодня» давлат ахборот агентлиги хабар тарқатган.
Янги асар «Туркманларнинг маънавий олами» деб номланади ва китоб миллий анъаналарга бағишланган.
Агентлик хабарида ёзилишича, 12 бобдан иборат китобда Бердимуҳамедов «ҳаёт гўзаллиги, ер юзидаги фаровонлик, абадий ҳаёт, илм-фан ва таълимнинг жамият ривожидаги аҳамияти, соғлом ҳаёт тарзини юритишнинг асослари, меҳнатсеварлик, меҳмондўстлик, дўстлик ва оға-инилик муносабатлари, ахлоқий меъёр ва бирликлар» ҳақида ҳикоя қилган.
«Бундан ташқари, китобда миллий мақоллар, иборалар, халқ ҳикматларига алоҳида ўрин берилган ва бу асарни янада бойитган», – дейилади давлат агентлигининг хабарида.
«Хроника Туркменистана» нашрининг қайд этишича, Бердимуҳамедов аввал туркман халқ мақолларига қизиқиб қолгани ҳақида гапирган. 2020 йил январь ойида у ОАВ ва маданият масалалари бўйича бош вазир ўринбосари Баҳоргул Абдиевага (аллақчон бошқа ишга ўтказилган) ҳикматлар, мақоллар ва мамлакат бойлиги ҳисобланувчи муомаладан чиқиб бораётган қимматли сўз бирикмаларини тўплаш ҳамда тизимга солиш юзасидан топшириқ берганди.
Июнь ойида Туркманистон президенти агрономлар билан учрашган ва уларга сув ҳақидаги мақолларни айтганди.
Тўрт кун аввал 3 август куни Гурбангули Бердимуҳамедовнинг барча, 63 та асардан иборат 11 томлик жамланма нашрдан чиққан ва онлайн тарзда ҳам тақдим этилган. Бердимуҳамедов йилига ўрта ҳисобда 4 тадан китоб ёзади.
Мавзуга доир:
- Таътилдаги Туркманистон президенти Бердимуҳамедов отга ем бериб, велосипедда сайр қилди
- Туркманистон президенти ниқоб тақиб балиқ овига чиқди. Март ойида ниқоб таққан туркманлар жаримага тортилаётганди
- Бердимуҳамедов Назарбоев билан коронавируснинг Орол бўйидаги шамоллар орқали тарқалишини муҳокама қилди
- Гурбангули Бердимуҳамедов 63 ёшга тўлиши муносабати билан қурбонликка оқ қўчқор сўйилди
Изоҳ (0)