Шавкат Мирзиёев 6 август куни 2020 йилда олий таълим муассасаларига қабулни ташкил қилиш ва 2020/2021-ўқув йилига тайёргарлик кўриш масалаларига бағишланган йиғилишда тегишли мутасаддиларга чекка ҳудудларни ҳам тезроқ интернет билан таъминлаш ва талабалар учун арзонлаштирилган интернет трафиклари ажратиш бўйича топшириқ берди. Бу ҳақда ЎзА хабар берган.
Қайд этилишича, Президентга мазкур таклифни Тошкент давлат шарқшунослик университети ректори Гулчеҳра Рихсиева билдирган.
«Талабалар билан доимий мулоқотдамиз, янги ўқув йилини бошлашда нималарга эътибор бериш ҳақида таклифлар оляпмиз. Пандемия сабаб якунланган ўқув йилидаги иккинчи семестрни онлайн тарзда ташкил қилдик, диплом иши ҳимояларини ўтказдик. Лекин шундан сўнг кўпчилик талабаларда ўзига хос таклифлар ва талаблар юзага келди. Агар янги ўқув йилини ҳам онлайн бошлайдиган бўлсак, чекка қишлоқларни ҳам интернет билан таъминлаш масаласини ҳамда талабалар учун муҳим бўлган арзонлаштирилган интернет трафикларни ажратиш борасида мурожаат қилдим. Йиғилишда тегишли мутасаддиларга бу бўйича топшириқ берилди», – деган Гулчеҳра Рихсиева.
Республика Олий таълим кенгаши раиси Ўктам Умурзоқов янги ўқув йили дастлаб 2,3,4-босқичда ўқийдиган талабалар учун онлайн тарзда бошланиши, кейинчалик 1-босқич талабалари ҳам таълимни бошлаганидан анъанавий шаклдаги дарсларга ўтилиши мумкинлигини маълум қилганди.
Аввалроқ Президент Шавкат Мирзиёев раҳбарлигида 6 август куни ўтган йиғилишда Ўзбекистонда ОТМларга кириш имтиҳонлари икки сменада Тошкент, Нукус шаҳарлари ва вилоятлардаги стадионларда ўтказилиши белгиланганди.
Изоҳ (0)