Муҳаббатни тараннум этувчи Yash Raj Films киноларини томоша қилмаган одам бўлмаса керак. Мелодрама жанрида ижод қилувчи ушбу кинокомпания нафақат Болливудда, балки дунё миқёсида машҳурликка эришди. Масалан, «Қўрқув» (1993) томошабинларга руҳий хаста инсоннинг ишқи ҳақида ҳикоя қилади, «Девона қалб» (1997) севги учбурчагини намоён этса, «Вир ва Зара» (2004) фильмида эса севги ҳатто халқаро муносабатларга ҳам ўз таъсирини ўтказади.
Албатта, Yash Raj Films суратга олган фильмлар билан таниш бўлсангиз-да, у ҳақидаги қизиқарли фактлардан хабардор эмассиз. Қуйида кутилмаган ва қизиқарли маълумотларни сиз билан бўлишамиз.
Швейцарияга бўлган муҳаббат
Yash Raj Films, асосан, фильмларини очиқ осмон остида суратга олгани билан шуҳрат қозонган. Яш Чопра фильмларининг ўзига хос хусусиятларидан бири — Швейцария тоғларидаги рақс саҳналари. Бундай картиналар фильмнинг ажралмас анъанасига айланган.
Романтикага илк қадам
Болливуднинг ишқ-муҳаббат қироли бўлмиш Яш бир куни машина бошқара туриб, кўчаларда илинган афишаларга кўз югуртиради. Уларнинг барчасида жангарилар сурати акс этган эди. Шу ондан бошлаб Яш романтик фильмлар учун сценарий ёзишга қарор қилди. Фильмлари бошқаларникидан ажралиб туришини мақсад қилган режиссёр «Чандни» фильмига актриса Шридевини таклиф этди.
Памела Чопра фақат Yash Raj Films учун куйлайди
Нима учун хонанда фақатгина ушбу кинокомпания учун куйлаган, деган савол пайдо бўлдими? Сабаби Памела Яшнинг рафиқаси эди, хонанда турмуш ўртоғи ҳамда ўғли учун қўшиқлар ижро этди. Масалан, «Чандни» фильмида Main sasural nahin jaoongi қўшиғи хонанда томонидан куйланган.
Шаши Капур компаниянинг фақат бир фильмида Амитабҳ Баччаннинг акасини ижро этган
Биласизми, деярли барча фильмларда Шаши Капур Баччаннинг укаси образида гавдаланган. Лекин айнан ака ролини ижро этган ягона фильм бу – «Севги риштаси».
«Тангри яратган жуфтлик» фильми анча йиллар аввал ёзилган
Фильм сценарийси 90 йилларда режиссёр Адитя Чопра томонидан ёзилган. Бош ролларга Шоҳрух Хон ҳамда Маниша Коирала жуфтликлари тасдиқланади. Афсуски, бундан аввал иккиси иштирок этган «Бир қарашда муҳаббат» мелодрамаси муваффақиятга эришмаганидан сўнг янги фильмнинг суратга олиш ишлари тўхтатилади. Орадан нақд 10 йил ўтиб, Шоҳрух Хон ҳамда дебютант Анушка Шарма иштирокида суратга олинган ушбу фильм кутилганидек натижа бера олди.
«Вир ва Зара»даги монолог биринчи дублда суратга олинган
Ажойиб актёр Шоҳрух Хон ушбу фильмда оммалашиб кетган «Мен — маҳбус 786» монологини биргина дублда ижро этган. Актёр бу билан режиссёрни ҳам ҳайратда қолдирган, ҳам хурсанд қилган.
Суратга олиш учун бир кун
Энг қизиғи, «Вир ва Зара» мелодрамасидаги қамоқхона саҳналарининг барчаси атиги бир кунда суратга олинган.
Риши Капур ва Ниту Сингҳ ўртасидаги муҳаббатнинг юзага келиши
Жуфтлик 1976 йил суратга олинган «Севги бу — ҳаёт» фильмида учрашди. Муҳаббат пайдо қилган фильм сабаб санъаткорлар 1980 йилда оила қурди ҳамда 40 йил давомида бахтли яшади.
Яш Чопранинг энг севимли фильми: «Севги онлари»
Режиссёр муаллифлик фильмлари орасидан энг севимлиси «Севги онлари» эканлигини айтиб ўтган. Энг ачинарлиси шундаки, ушбу фильм томошабинлар томонидан яхши қабул қилинмаган, натижада фильм касодга учраган. Бу ҳодиса Яшни ҳайратга солган, ҳатто ранжитган ҳам.
Акшай Кумар ва Яш Чопра орасидаги 11 йиллик низо
1997 йил «Девона қалб» фильмини суратга олиш давомида Яш ваъда қилган пулни Акшайга тўламаганлиги учун улар орасида келишмовчилик пайдо бўлади. Бу низо 11 йил давом этади.
Yash Raj Films маҳсулоти – «Ўғирланмаган келин» фильмига бир қанча режиссёрлар ҳам мухлислик қилади. Жумладан, улар орасида таниқли режиссёр Сураж Баржатия ҳам бор. Маълумотларга кўра, Сураж янги фильм устида ишлашдан аввал қайта-қайта «Ўғирланмаган келин»ни томоша қилар экан. Демак, режиссёр ушбу фильмни неча марта кўрганини тахмин қилиш қийин эмас.
Изоҳ (0)